BAKI, AzerVoice Analitik Təhlil Mərkəzi – Misirdə azyaşlılar və yeniyetmələr arasında narkomaniyanın yayılması ölkənin üzləşdiyi ən ciddi və eyni zamanda səssiz sosial problemlərdən birinə çevrilib. Qahirədə narkomaniya üzrə tanınmış mütəxəssis Dr. Abdul Rahman Hammadın sözlərinə görə, paytaxtda yüzlərlə uşaq narkotikdən əziyyət çəkir və bir çoxu depressiya nəticəsində özünə qəsd etməyə cəhd göstərib. Onun müalicə etdiyi bir uşaq da bu faciəni yaşayanlardan biridir.
Dr. Hammad bildirir ki, bəzi valideynlər ictimai qınaq qorxusu səbəbilə uşaqlarının narkotik problemi ilə bağlı yardım axtarmağa belə çəkinirlər. Bu isə vəziyyəti daha da ağırlaşdırır.
Misirdə aparılan araşdırmalar göstərir ki, narkotikə aludəçilik məktəblərdə adətən siqaret və qəlyanla başlayır, sonra isə həşiş, spirtli içkilər və nəhayət, sintetik maddələrə keçid baş verir. Hal-hazırda məktəblərdə "Vudoo", "Astrox", "toz" və "Tramadol" kimi maddələrin istifadəsi geniş yayılıb.
Statistika təhlükəni göstərir
Misirin Narkomaniya və Sui-istifadə ilə Mübarizə Fondunun məlumatlarına görə, narkotik istifadəçilərinin 13 faizi 15 yaşdan aşağı, 38 faizi isə 15-20 yaş arası gənclərdir. Ən çox istifadə edilən maddələr arasında "Estrox", "Vodoo", "Powder" və "Şabu" yer alır.
Dr. Hammad bu maddələrin ucuz qiymətə əldə olunmasının və bəzi testlərdə aşkar edilməməsinin onları yeniyetmələr üçün daha əlçatan etdiyini vurğulayır. O əlavə edir ki, bu maddələr uşaqların beyninin inkişafına mənfi təsir edir və korteksin strukturunda dəyişikliklər yaradır. Nəticədə isə emosional pozuntular, ani ağlama və gülmə halları, depressiya və aqressiv davranışlar meydana çıxır.
Məxfi müalicə və maarifləndirmə tədbirləri
Fond narkotik asılılığından əziyyət çəkənlər üçün tam məxfi və pulsuz müalicə imkanları təqdim edir. Eyni zamanda narkomaniyanın fəsadları ilə bağlı maarifləndirmə işləri aparılır. Lakin məktəblərdə reabilitasiya proqramlarının olmaması səbəbilə uşaqlar çox vaxt bu təhlükə barədə lazımi məlumatlara sahib olmur.
Yoxsulluq və məlumatsızlıq əsas səbəblərdən biridir
Ekspertlər bildirir ki, yoxsulluq və maarifləndirmə çatışmazlığı gəncləri narkotik istifadə etməyə meylləndirir. 18 qubernatorluqda mindən çox kənddə, xüsusilə ən yoxsul bölgələrdə seminarlar və təbliğat tədbirləri keçirilir. 2021-ci ildən bu yana "Narkotiklərsiz kənd" kampaniyası çərçivəsində kənd sakinləri, uşaqlar və gənclər üçün maarifləndirmə işləri aparılır.
Narkokuryerlər hər yerdə: məktəb avtobuslarından tutmuş şəhər küçələrinə qədər
Misirin Daxili İşlər Nazirliyinin məlumatına əsasən, 2023-cü ildə 150 məktəb avtobusu sürücüsünün narkotik daşıyıcısı (narkokuryer) kimi fəaliyyət göstərdiyi müəyyən edilib. Bu fakt, narkotik şəbəkələrinin məktəblərə qədər sızdığını göstərir və təhlükənin nə qədər ciddi olduğunu sübut edir.
