BAKI,AzerVoic Analitik Təhlil Mərkəzi
İsrailin Baş Qərargah rəisi Eyal Zamir xəbərdarlıq edib ki, Qəzza şəhərinə nəzarəti ələ keçirmək planı nəticə etibarilə bölgənin İsrailin hərbi hökuməti tərəfindən idarə olunmasına gətirib çıxara bilər. Bu barədə İsrailin “Ynet” xəbər portalı bu gün, bazar ertəsi məlumat yayıb.
Hesabata görə, Zamir İsrail Təhlükəsizlik Şurasının bazar günü axşam keçirilən iclasında belə deyib: “Siz hərbi hökumət qurulması istiqamətində gedirsiniz.” O əlavə edib: “Sizin planlarınız bizi ora aparır... Nəticələrini anlayın.” Bu barədə Almaniya Xəbər Agentliyi (DPA) də məlumat verib.
İsrail Baş Qərargah rəisi həmçinin bildirib ki, ölkənin siyasi rəhbərliyi müharibədən sonrakı dövr üçün heç bir alternativ hazırlamayıb.
Qeyd edək ki, İsrail 1967-ci ildəki Altıgünlük müharibədən sonra Qəzzada hərbi hökumət qurmuşdu. Həmin vaxtadək bölgə Misirin idarəsi altında idi. Daha sonra Fələstinlilərlə əldə olunan razılaşmalara əsasən, İsrail Qəzzanın mülki idarəsini 30 ildən artıq müddət əvvəl Fələstin Muxtariyyətinə təhvil vermiş, lakin sərhədlərə nəzarəti özündə saxlamışdı.
2005-ci ildə İsrailin Qəzzadan çıxması ilə bölgədəki hərbi mövcudluq sona çatmışdı. Buna baxmayaraq, İsrail qüvvələri sərhəd üzərində nəzarəti davam etdirmişdi. 2007-ci ildə isə HƏMAS hərəkatı Qəzzada hakimiyyəti ələ almışdı.
Qəzzada İsrailin hərbi hökumətə qayıdışı həm geri addım kimi qiymətləndirilir, həm də iki dövlətli həll ümidlərini puça çıxara biləcək bir proses kimi dəyərləndirilir.
“Ynet”in məlumatına görə, Zamir girovların azad edilməsi üçün HƏMAS-la razılaşma əldə edilməsinə çağırıb. Lakin Baş nazir Benyamin Netanyahu bu məsələ üzrə səsvermənin keçirilməsinə qarşı çıxaraq, bunun iclasın gündəliyində olmadığını bildirib.
HƏMAS ötən ay vasitəçilərin irəli sürdüyü yeni atəşkəs təklifini qəbul etdiyini açıqlamışdı. İsrail isə indiyədək bu təşəbbüsə cavab verməyib.
Hazırda Qəzzada 48 girov saxlanılır. İsrail hökuməti onlardan yalnız 20 nəfərin sağ olduğuna inanır. Zamir isə daha əvvəl xəbərdarlıq etmişdi ki, Qəzzaya hərbi nəzarət girovların həyatını təhlükəyə ata bilər.
