BAKI,AzerVoice Analitik Təhlil Mərkəzi
Malayziyada yüzlərlə fəal ABŞ prezidenti Donald Trampın gələn ay ölkəyə edəcəyi səfərə qarşı etiraz aksiyası keçirib. Aksiya iştirakçıları hökuməti Trampı “müharibə cinayətləri və Qəzzada soyqırım dəstəyində iştirak” ittihamı ilə ölkəyə dəvət etməməyə çağırıblar.
Etirazçılar paytaxt Kuala-Lumpurda yerləşən Bukit Bintang işgüzar məhəlləsindəki “McDonald’s” restoranı qarşısından yürüşə başlayıblar. Onlar İsrail işğalına dəstək verdiyini düşündükləri şirkətlərin boykot edilməsinə çağırış edərək, daha sonra Petronas əkiz qüllələrinin yerləşdiyi meydana yollanıblar. Sloganlarda ABŞ-ın İsrailə hərbi, maliyyə və siyasi dəstək verməklə “soyqırımın birbaşa himayədarı” olduğu vurğulanıb.
Aksiyanın əsas şüarı “Tramp – gəlmə” olub. İştirakçılar arasında qadınlar və uşaqların çoxluğu, habelə tanınmış ictimai qurumların fəalları diqqət çəkib. Onların bir qismi hökumətə yaxın təşkilatlar hesab olunur.
Sosial şəbəkələrdə “Hakim” adı ilə tanınan tanınmış fəal Trampın dəvətini “Malayziya xalqına hörmətsizlik” adlandırıb.
“Tramp şəxsən soyqırımın maliyyələşməsinə cavabdehdir. Biz sülhsevər xalqıq və ayaqları qanlı bir cinayətkarı ölkəmizdə görmək istəmirik,” – deyə o bildirib.
Hakim ABŞ səfirliyi qarşısında dəfələrlə təkbaşına etiraz aksiyaları keçirib, ABŞ-ı müharibə cinayətlərində iştirakda ittiham edən plakatlarla çıxış edib.
“Fələstinlə Həmrəylik Katibliyi”nin baş katibi Tyan Çua isə Trampın dəvətini “ASEAN-ın prinsiplərinə zidd” adlandırıb. Onun sözlərinə görə, Trampın mövqeyi regionun sülh, sabitlik və əməkdaşlıq ruhuna ziddir və “müharibə cinayətkarının” ASEAN sammitində iştirakı təşkilata ancaq zərər gətirəcək.
“İkram” Fondunun rəhbəri Bədli Şah Şam Baharin də daxil olduğu bir çox vətəndaş cəmiyyəti təşkilatları ortaq bəyanat yayaraq, Trampı “soyqırım prezidenti” adlandırıblar və onun səfərinin Malayziya üçün “utancverici” olacağını bildiriblər.
Bununla yanaşı, Baş nazir Ənvar İbrahim Trampın ASEAN sammitinə qatılmasını regionun geosiyasi rolunun güclənməsi baxımından diplomatik imkan kimi qiymətləndirir. Şam Baharin isə bu izahı anladığını desə də, ABŞ-ın İsrailə dəstəyinin dayandırılması üçün ictimai təzyiqin davam etdirilməsinin vacibliyini vurğulayıb.
Bəyanatda əlavə olaraq qeyd olunub ki, Almaniyanın İsrailə silah ixracını dayandırmaq qərarına baxmayaraq, ABŞ hələ də yeganə əsas silah təminatçısı olaraq qalır və bu, “soyqırımın davamına birbaşa ortaq olmaq” deməkdir.
Onlarla təşkilatın imzaladığı ortaq bəyanatda Trampın səfəri “xalqın iradəsinə zidd” adlandırılıb və hökumət ABŞ-a alternativ tərəfdaşlar axtarmağa çağırılıb. Qurumlar Çinin bölgədə mümkün strateji tərəfdaş kimi önə çıxdığını qeyd ediblər.
Fəallar etirazların davam etdiriləcəyini bildiriblər: “Dünya xalqlarının təzyiqi sayəsində İsrail artıq tənha bir dövlətə çevrilib. Malayziya xalqı da səsini yüksəltməlidir,” – deyə bəyanatda vurğulanıb.
