BAKI, AzerVoice Analitik Təhlil Mərkəzi
“Telegraph” qəzetinin yazdığına görə, Donald Trampın rəhbərlik etdiyi Respublikaçılar Partiyasında Qəzza müharibəsi fonunda İsrail baş naziri Benyamin Netanyahunun dəstəklənməsi məsələsi ciddi mübahisələr yaradıb.
Məlumata görə, Tramp və vitse-prezident Cey Di Vensin hakimiyyətə gəlməsindən sonra Vaşinqtonda keçirilən Milli Mühafizəkar Hərəkatın illik toplantısında bayram əhvali-ruhiyyəsi gözlənilsə də, İsrail siyasəti barədə fikir ayrılığı tədbirə damğa vurub.
Mühafizəkar çevrələrin bir qismi İsrailin Qəzzadakı müharibəsini dəstəkləməyin siyasi yükə çevrildiyini bildirir. “The American Conservative” jurnalının direktoru Kurt Mills konfransda çıxış edərək qeyd edib: “Tramp hərəkatı ideoloji baxımdan həqiqətən bütöv olmaq istəyirsə, istisna edə bilməyəcəyi ölkə İsraildir”.
Tramp administrasiyasından tanınmış fiqurlar – miqrasiya rəsmisi Tom Homan, kəşfiyyat direktoru Tulsi Qabbard və “MAGA” hərəkatının əsas simalarından Stiv Bannon tədbirdə iştirak ediblər. Lakin bir çoxları ABŞ-ın Yaxın Şərqdə dərinləşən münaqişələrə sürüklənəcəyindən narahatdır. Millsin sözlərinə görə, ABŞ artıq enerji ixracatçısıdır və İsrailin müdafiəsi strateji baxımdan əvvəlki qədər əsaslı arqument deyil.
Bannon və sabiq Konqres üzvü Met Gets Trampa xəbərdarlıq edərək İsrailə dəstəyin “siyasi yük” olduğunu bildiriblər. Respublikaçı konqresmen Marjori Teylor Qrin isə İsrailin Qəzzadakı hərbi əməliyyatlarını “soyqırımı” adlandıraraq partiyanın ənənəvi xətti ilə ziddiyyətə düşüb.
Netanyahu bu tənqidlərə cavabında “İsrail İranla mübarizə aparır, əgər MAGA hərəkatına üzv olmaq istəyirsinizsə, İsrailin əleyhinə ola bilməzsiniz”, – deyib.
Stiv Bannon isə sərt reaksiya göstərərək bildirib: “Amerikalı vətəndaşlar sizin MAGA barədə fikirlərinizlə maraqlanmır, onlar bizi öz müharibənizə cəlb etmək üçün söylədiyiniz yalanların ifşa olunmasını istəyir”.
