BAKI, AzerVoice
Fələstinli HƏMAS hərəkatının nümayəndə heyəti bazar günü Misirin paytaxtı Qahirəyə çatacaq, burada ABŞ, Misir və Qətərin vasitəçiliyi ilə İsraillə dolayı danışıqlar aparılacaq. Görüşlərin məqsədi ABŞ prezidenti Donald Trampın Qəzza müharibəsinə son qoymaq planının icra detalları üzərində razılığa gəlməkdir.
HƏMAS rəhbərliyi ümumilikdə planı müsbət qarşılayıb, lakin bəzi bəndlərin dəqiqləşdirilməsini və texniki izahını tələb edir. Hərəkat danışıqlar zamanı müzakirə olunacaq beş əsas məqsədi müəyyənləşdirib.
Girovların təhvil verilmə vaxtı
HƏMAS nümayəndə heyəti girovların 72 saat ərzində təhvil verilməsinin mümkün olmadığını vurğulayacaq. Bildirilir ki, hərəkat üzvləri və digər fələstinli fraksiyalar hazırda sağ qalan girovların və həlak olanların cəsədlərinin müəyyənləşdirilməsi üzərində işləyirlər.
HƏMAS həmçinin qeyd edib ki, bəzi cəsədlər İsrailin dağıtdığı evlərin xarabalıqları altında qalıb və onların çıxarılması üçün ağır texnikaya ehtiyac var.
Hərəkat girovların təhvil verilməsi zamanı hərbi parad və ya kütləvi tədbir keçirilməyəcəyinə dair öhdəlik götürəcək.
İsrail ordusunun mərhələli çıxarılması
HƏMAS İsrail qoşunlarının geri çəkilməsi üçün aydın vaxt cədvəli tələb edəcək. Təşkilat ABŞ və digər vasitəçilərdən təminat istəyir ki, İsrail razılaşmadan sonra öhdəliklərini pozmasın.
İlkin mərhələdə HƏMAS yanvar ayında əldə olunan əvvəlki razılaşma üzrə təyin edilmiş mövqelərə geri çəkilməyi istəyir.
Müharibənin tam dayandırılması
Təşkilat üçün ən mühüm bəndlərdən biri davamlı atəşkəs və müharibənin yekunlaşdırılmasıdır. HƏMAS ABŞ və beynəlxalq vasitəçilərdən bu məsələ ilə bağlı açıq və yazılı təminat almaq niyyətindədir ki, İsrail sonradan hərbi əməliyyatlara yenidən başlamasın.
Silah məsələsi
HƏMAS nümayəndə heyəti silahların təhvil verilməsi prosesinə dair aydın mexanizm hazırlanmasını istəyəcək.Təşkilat bildirir ki, silahlar yalnız razılaşdırılmış fələstinli quruma, ərəb ölkələrinin iştirakı ilə və fələstinli fraksiyaların ortaq qərarı əsasında təhvil verilə bilər.
Yenidənqurma və humanitar yardım
Son bənd Qəzzanın bərpası və beynəlxalq yardımın təmin edilməsi ilə bağlıdır. HƏMAS xüsusilə ABŞ-dan bərpa planının dərhal icrasına dair açıq təminat gözləyir.
Bu çərçivədə tibbi və təhsil müəssisələrinin dağıntılarının dərhal aradan qaldırılması, humanitar yardımın məhdudiyyətsiz şəkildə bölgəyə daxil olması və bərpa işlərinin dərhal başlanması tələb edilir.
Qahirə danışıqları HƏMAS və İsrail arasında münaqişənin sonlandırılması istiqamətində ən kritik mərhələ kimi qiymətləndirilir. Tərəflərin razılığa gəlməsi, Qəzzada iki ildən çox davam edən müharibəyə son qoymaq üçün real şans hesab olunur.
