BAKI,VOA, Fərid Mikayılov
Türkiyənin müdafiə sənayesi şirkəti CANiK ABŞ-ın Radian şirkəti ilə birgə hazırladığı PRIME RADIAN adlı yeni mikro-kompakt tapançanı Türkiyə bazarında satışa təqdim edib.
VOA xəbər verir ki, METE MC9 PRIME platforması əsasında hazırlanan yeni model CANiK-in mühəndislik həllərini Radian-ın atış idarəetmə texnologiyaları ilə birləşdirir.
Məhsul gündəlik daşınma üçün nəzərdə tutulmuş kompakt ölçülərini qorumaqla yanaşı, daha sabit və dəqiq atış imkanları təqdim etməyi hədəfləyir.
Yeni modeldə Radian tərəfindən hazırlanmış RAMJET lüləsi və AFTERBURNER kompensator sistemi zavoddan standart təchizat kimi təqdim olunur. Şirkətin məlumatına əsasən, bu sistem atış zamanı yaranan geritəpmə və lülənin yuxarı qalxmasını azaltmağa hesablanıb.
Tapançada həmçinin Radian istehsalı olan arxa tutacaq və daraq ötürücü hissə istifadə edilib. Bildirilir ki, bu komponentlər silahın daha rahat tutulmasına və darağın dəyişdirilməsi prosesinin sürətlənməsinə kömək edir.
PRIME RADIAN modeli düz tetik mexanizmi, yenilənmiş tutacaq quruluşu və optik nişangahlarla uyğun sürgü sistemi ilə təchiz olunub. Standart komplektasiyaya gecə və gündüz istifadə üçün nəzərdə tutulmuş tritium nişangah sistemi də daxildir.
Şirkətin açıqlamasına görə, optik uyğun sürgü müxtəlif qırmızı nöqtəli nişangah sistemlərinin quraşdırılmasına imkan verir. Məhsul geniş aksesuar dəsti ilə birlikdə təqdim olunur.
CANiK bildirib ki, PRIME RADIAN mikro-kompakt ölçülərinə baxmayaraq, daha böyük idman tipli modellərdə istifadə olunan atış idarəetmə xüsusiyyətlərini özündə birləşdirir.
Yeni model 16 iyul tarixindən etibarən Ankarada və İstanbulda fəaliyyət göstərən Makina ve Kimya Endüstrisi (MKE) satış məntəqələrində satışa çıxarılıb. Məhsulla İstanbul, Ankara və Samsundakı CANiK STORE mağazalarında da tanış olmaq mümkündür.
