BAKI, VOA
Müasir avtomobil sənayesində proqram təminatı vasitəsilə avtomobillərin imkanlarını genişləndirmək tendensiyası artsa da, bəzi istehsalçıların artıq quraşdırılmış funksiyaları "ödəniş divarı" (paywall) arxasında gizlətməsi ciddi narazılıq doğurur. "Volvo" şirkəti isə bu məsələdə müştərilərin tərəfindədir.
VOA xəbər verir ki, "Volvo"nun baş ticari direktoru (CCO) Erik Severinson avtomobillərdəki baza funksiyaları üçün abunəlik modeli və əlavə ödənişə kəskin etiraz edib.
Severinson bildirib ki, premium seqmentdə müştəriləri xırda ödənişlərlə yormaq düzgün deyil.
"Əgər siz premium məhsul satırsınızsa, müştərini 'qəpik-quruş' üçün sıxmamalısınız. Təxminən 80,000 dollar xərcləyən birindən qızdırılan oturacaqlar kimi baza funksiyaları üçün əlavə ödəniş istəmək olmaz ,xüsusən də bu funksiyalar daha ucuz avtomobillərdə standart olaraq təqdim edildiyi halda. Bu, düzgün yol deyil".-deyə o qeyd edib.
O əlavə edib ki, abunəlik modeli yalnız daha geniş əhatəli proqram xidmətləri, qabaqcıl sürücü yardım sistemləri və ya internet paketləri üçün məntiqli ola bilər. Lakin artıq avtomobildə fiziki olaraq mövcud olan avadanlığın (hardware) proqramla bloklanması Volvonun fəlsəfəsinə ziddir.
