BAKI,AzerVoice

Fatih Sultan Mehmed, İstanbulun fəthindən dərhal sonra Vəziri-əzəm Çandarlı Halil Paşanı edam etdirdi. Halil Paşa, İstanbul mühasirəsinin başlanğıcından etibarən bu işə qarşı çıxır və Bizanslılarla yaxşı münasibətlər tərəfdarı idi. Çandarlının bu siyasəti, ona qarşı olan digər vəzirlər tərəfindən, guya Bizans imperatorundan rüşvət aldığı şəklində təbliğat vasitəsinə çevrilmişdi.

Ancaq onun İstanbul mühasirəsinə qarşı olmasının əsas səbəbi, Osmanlıya qarşı xaçlı qüvvələrinin hərəkətə keçmə ehtimalı idi. Çandarlı, II Muradın sülh siyasətini davam etdirmək istəyirdi və əgər İstanbul fəth edilə bilməzsə, Osmanlı İmperiyasının qarşılaşa biləcəyi böyük təhlükələrin fərqində idi. Həmçinin Fatihlə arasındakı düşmənçiliyə görə, İstanbulun fəthinin ona gətirəcəyi sonsuz gücün öz sonunu gətirəcəyini də bilirdi. Onun İstanbul mühasirəsinə qarşı çıxmasının əsas səbəbləri bunlardır. Bizanslılardan rüşvət aldığı yolundakı iddialar isə əsassızdır.

Fatihin ilk hakimiyyəti dövründə (1444–1446) Çandarlı Halil Paşa ilə gənc sultan arasında bir düşmənçilik yaranmış və II Mehmed, Halil Paşa üzündən taxtı atasına vermək məcburiyyətində qalmışdı. Bundan əlavə, Fatihin ətrafındakı kapıkulu mənşəli vəzirlər də onu Halil Paşaya qarşı qızışdırırdılar. Fatih, öz hakimiyyətinə maneə kimi gördüyü Çandarlı Halil Paşanı, fəthdən dərhal sonra, rüşvət haqqında yayılan şayiələri bəhanə edərək ortadan qaldırmışdır.