Bakı, AzerVoice

Son günlər baş verən qar fırtınaları, çovğun və güclü külək səbəbindən qar korluğu hallarında artım müşahidə edilir.

AzerVoice xəbər verir ki , Ankara Təhsil və Araşdırma Xəstəxanasının Göz Xəstəlikləri Mütəxəssisi Dos. Dr. Evin Şingar, qar və buzdan əks olunan ultrabənövşəyi (UV) şüaların gözlərə ciddi ziyan vura biləcəyini və fotokeratit adlı xəstəliyə səbəb ola biləcəyini bildirib.

Qar korluğunun əsas simptomları arasında göz ağrısı, yanma və sancma , qızartı və sulanma,işığa həssaslıq və bulanıq görmə yer alır.

Dos. Dr. Şingar bildirib ki, buynuz qişa və konyunktivanın zədələnməsi müvəqqəti görmə itkisinə səbəb ola bilər. Nəticədə, xəstələr böyük panika ilə xəstəxanalara müraciət edirlər.

Bu xəstəlik gözün ultrabənövşəyi şüalara uzun müddət məruz qalması nəticəsində yaranır. Qar və buz günəş işığını əks etdirərək gözə daha çox UV şüası yönləndirir. Bu isə buynuz qişanın üst qatının (epitel toxumasının) zədələnməsinə səbəb olur.

Şingar qeyd edib ki, qar korluğu olan xəstələrdə epitel təbəqəsində ödem, qızartı və hətta kiçik soyulmalar müşahidə edilə bilər. Bu isə infeksiyalara şərait yaradır.

Qar korluğu yaranması halında gözləri soyuq kompreslə sakitləşdirmək,bol maye qəbul etmək və süni gözyaşı damcıları istifadə etmək, infeksiya riski varsa, antibiotik damcılarından istifadə etmək lazımdır. Şiddətli hallarda müvəqqəti qoruyucu kontakt linzalardan istifadə edilə bilər, 2-3 gün ərzində isə simptomlar azalır

Qar korluğundan qorunmaq üçün xüsusilə UV qoruyuculu linzalı günəş eynəyi taxmaq, qarlı havada geniş kənarlı papaq geyinmək,gözlərin uzun müddət günəş işığına və qara baxmasının qarşısını almaq vacibdir.

Şingar xəbərdarlıq edib ki, qar korluğu ümumiyyətlə qalıcı deyil, lakin çox güclü UV şüalarına uzun müddət məruz qalmaq görmə sinirlərinə və macula bölgəsinə ciddi ziyan vura bilər. Bu isə daha ciddi və qalıcı görmə problemlərinə səbəb ola bilər.

Qar korluğundan qorunmaq üçün yayda olduğu kimi qış aylarında da günəş eynəkləri taxmaq vacibdir!