BAKI,VOA

Alimlər sahil eroziyasını dayandırmaq və çimərlikləri xilas etmək üçün qumları elektrikləşdirməyi təklif edirlər. Tədqiqatçılar deyirlər ki, infrastrukturu zədələyən və torpaq itkisinə səbəb olan eroziya hər il dünyada milyardlarla dollar ziyana səbəb olur. Dəniz səviyyəsinin yüksəlməsi ilə sahil eroziyası xüsusilə sahilyanı ərazilərdə yaşayanlar üçün böyük təhlükə yaradır. Dünya əhalisinin təxminən 40 faizinin bu bölgələrdə yaşadığı təxmin edilir.

Mütəxəssislər əsrin sonuna qədər çimərliklərin 26 faizinin yox ola biləcəyini proqnozlaşdırırlar.

Bu problemin öhdəsindən gəlmək üçün hazırlanmış üsullar qısa müddətli həllər təmin etsə də, baha başa gəlir. ABŞ-ın Şimal-Qərb Universitetinin tədqiqatçıları çimərliklərdəki qumu qaya formasına salmaqla uzunmüddətli çıxış yolu ola biləcək yeni üsul hazırlayıblar.

Onlar elektrik enerjisindən istifadə edərək qum dənələri arasında təbii sement yaradan bir proses hazırlayıblar. Bu proses laboratoriya təcrübələrində uğurlu nəticələr göstərmişdir.

Lakin bu metodun uzunmüddətli təsirləri və mürəkkəb sahil bölgələrində tətbiq edilməsi hələ ki, aydın deyil. Tədqiqatçılar bu üsulu real sahil ərazilərində sınaqdan keçirməyi planlaşdırırlar.