Böyük Britaniyanın Xarici İşlər naziri İvet Kuper Hörmüz boğazındakı vəziyyətlə bağlı rəsmi bəyanat verərək, beynəlxalq ticarət yollarının təhlükəsizliyi məsələsinə toxunub. Nazir boğazın fəaliyyətinin bərpası üçün Londonun qəti şərtlərini açıqlayıb.
VOA xəbər verir ki, Xarici İşlər naziri Kuper bildirib ki, qlobal enerji təhlükəsizliyi və dəniz ticarəti üçün həyati əhəmiyyət kəsb edən Hörmüz boğazı heç bir kənar təsirə məruz qalmamalıdır.
"Hörmüz boğazı heç bir məhdudiyyət və ya rüsum tətbiq edilmədən tamamilə yenidən açılmalıdır."-deyə o bildirib.
Londonun bu bəyanatı İranın boğazdan keçən gəmilərdən rüsum alınması və ya müəyyən məhdudiyyətlər tətbiq edilməsi barədə irəli sürdüyü iddialara birbaşa cavabdır. Britaniya hökuməti beynəlxalq dəniz hüququna əsaslanaraq, tranzit keçidlərin suveren dövlətlər tərəfindən birtərəfli qaydada vergiyə cəlb edilməsinin və ya bloklanmasının qəbul edilməz olduğunu vurğulayır.
Analitiklər qeyd edirlər ki, İvet Kuperin bu çıxışı İslamabadda keçiriləcək ABŞ-İran danışıqları öncəsi Qərb müttəfiqlərinin vahid mövqeyini nümayiş etdirir. London bu məsələdə Vaşinqtonun "maksimum təzyiq" və "qeyd-şərtsiz açılış" strategiyasını tam dəstəkləyir.
