BAKI,VOA, Nailə Babazadə
Hörmüz boğazına doğru irəliləyən bəzi quru yük gəmiləri və tankerlərin geri döndüyü müşahidə olunur.
VOA xəbər verir ki, İran Milli Təhlükəsizlik Yüksək Şurası boğazdakı vəziyyət və ABŞ ilə aparılan danışıqlar prosesinə dair bəyanat yayaraq bildirib ki, Birləşmiş Ştatların dəniz blokadası tətbiq edərək gəmilərin keçidinə mane olması "atəşkəs pozuntusu" hesab ediləcək. Tehran həmçinin vurğulayıb ki, ABŞ-ın bu addımlarına cavab olaraq İran boğazın "şərtli və məhdud" şəkildə açılmasını əngəlləyəcək.
Beynəlxalq mediada yer alan məlumatlara görə, İran radiostansiyalar vasitəsilə gəmilərə xəbərdarlıq göndərib. Bildirişdə qeyd olunub ki, ABŞ-ın danışıqlarda öz öhdəliklərini yerinə yetirməməsi səbəbindən İran Hörmüz boğazını yenidən "bağlı" elan edir. Bu qərara əsasən, heç bir növə və ya ölkəyə məxsus gəminin boğazdan keçidinə icazə verilməyəcək.
Gəmilərin real vaxt rejimində izlənilməsini təmin edən "MarineTraffic" şirkətinin məlumatları da bu gərginliyi təsdiqləyir. Boğazdakı qeyri-müəyyənlik səbəbindən strateji yüklər daşıyan bir neçə gəmi hərəkət istiqamətini dəyişib. Xüsusilə Qətərin Doha limanından yola düşən və maye təbii qaz (LNG) daşıyan "Al Ghashamiya", "Lebrethah" və "Fuwairit" tankerlərinin geri döndüyü qeydə alınıb.
Bundan əlavə, təyinat məntəqəsi Çin olan Honq-Konq bayraqlı "Sun Profit" quru yük gəmisi və Fransanın "CMA CGM" şirkətinə məxsus 3 konteyner gəmisinin də rotalarını dəyişən gəmilər arasında olduğu bildirilir. Regionda yaranmış bu vəziyyət qlobal enerji və tədarük zənciri üçün ciddi narahatlıq yaradıb.
