BAKI,VOA,Yusif Şərifzadə

İran Hörmüz boğazında gəmi hərəkətinin nəzarət altında saxlanıldığını və son sutka ərzində onlarla gəminin keçidinin koordinasiya edildiyini açıqlayıb.

VOA xəbər verir ki, İranın İslam İnqilabı Keşikçiləri Korpusunun Hərbi Dəniz Qüvvələri son 24 saat ərzində Hörmüz boğazından 20 gəminin keçdiyini açıqlayıb.

İranın Fars Xəbər Agentliyinin yaydığı məlumata görə, keçidlər İran qüvvələrinin koordinasiyası altında həyata keçirilib.

Açıqlamada bildirilib ki, strateji əhəmiyyət daşıyan Hörmüz boğazında gəmi hərəkəti daim nəzarətdə saxlanılır və keçidlər əvvəlcədən əlaqələndirilir.

Bəyanat ABŞ və İran arasında Hörmüz boğazının statusu və idarə olunması ilə bağlı müzakirələrin davam etdiyi bir vaxtda səsləndirilib.

Tehran boğaz üzərində suveren hüquqlarını vurğulamaqda davam edir. Vaşinqton isə beynəlxalq ticarət və enerji daşımaları üçün mühüm əhəmiyyət daşıyan bu marşrutda gəmiçiliyin maneəsiz şəkildə davam etməsinin vacibliyini ön plana çıxarır.

Mütəxəssislərin fikrincə, qlobal enerji bazarları üçün həyati əhəmiyyət daşıyan Hörmüz boğazında baş verən hər bir hadisə beynəlxalq bazarlarda diqqətlə izlənilir və regiondakı təhlükəsizlik vəziyyətinə birbaşa təsir göstərir.