BAKI,VOA Orxan Qədirzadə
ABŞ Prezidenti Donald Tramp Vaşinqtonun İranla aparılan danışıqlarda irəli sürdüyü tələblərin demək olar ki, hamısının Tehran tərəfindən qəbul edildiyini bildirib.
Tramp CNBC telekanalına müsahibəsində tərəflər arasında danışıqların davam etdiyini vurğulayaraq, "Düşünürəm ki, onlar bizə lazım olan demək olar ki, bütün şərtlərlə razılaşıblar", - deyə bildirib.
ABŞ Prezidenti bir daha bəyan edib ki, Vaşinqtonun məqsədi İranda hakimiyyət dəyişikliyinə nail olmaq deyil.
"Mən çox sadə bir məqsədə nail olmağa çalışıram: İran nüvə silahına sahib olmamalıdır", - deyə Tramp vurğulayıb.
O, həmçinin bildirib ki, İranın hələ müəyyən sayda raketi qalıb, lakin onların da məhv edilə biləcəyini iddia edib.
Tramp əlavə edib ki, ötən həftə İranın ABŞ gəmisinə doğru pilotsuz uçuş aparatı göndərməsindən sonra ABŞ İran hədəflərinə üç güclü zərbə endirib.
