BAKI,VOA,Yusif Şərifzadə

İran Səudiyyə Ərəbistanı ilə Yəmən arasında artan gərginliyin hərbi deyil, siyasi və diplomatik yollarla həll edilməsinin vacibliyini bəyan edib. Tehran münaqişənin yalnız dialoq vasitəsilə aradan qaldırıla biləcəyini vurğulayıb.

VOA xəbər verir ki, İran Xarici İşlər Nazirliyinin sözçüsü İsmayıl Bəqai yaydığı bəyanatda Yəmən böhranının "ədalətli həllinə" ehtiyac olduğunu bildirib.

Bəqai qeyd edib ki, Yəməndəki münaqişənin hərbi həlli yoxdur. Onun sözlərinə görə, dialoq prosesinə qayıdılması və tərəflər arasında razılaşdırılmış yol xəritəsinin tam şəkildə həyata keçirilməsi Yəmən xalqının əzablarına son qoymaq, həmçinin regionda təhlükəsizlik və sabitliyi təmin etmək üçün yeganə çıxış yoludur.

İran rəsmisi həmçinin ABŞ-ın regiondakı siyasətinin Yəməndəki vəziyyəti daha da mürəkkəbləşdirdiyini iddia edib.

Bəqainin bəyanatında tərəflər arasında diplomatik təmasların bərpasının və siyasi həll mexanizmlərinin gücləndirilməsinin vacibliyi vurğulanıb.

ABŞ və Səudiyyə Ərəbistanı İranın bu açıqlamalarına hələlik rəsmi münasibət bildirməyiblər.