Bakı. AzerVoice:

Avropa İttifaqı (Aİ) Türkiyə ilə daha sıx əlaqələr qurmaq istəyir.

AzerVoice-nin məlumatına görə, bu barədə Aİ-nin Xarici İşlər və Təhlükəsizlik Siyasəti üzrə Ali Nümayəndəsi Cozep Borel deyib.

Avropa İttifaqı (Aİ) ölkələrinin xarici işlər nazirləri Aİ-yə sədrlik edən Belçikanın paytaxtı Brüsseldə qeyri-rəsmi görüşlərdə bir araya gəlib.

Gündəlik məsələlərindən birinin Türkiyə ilə münasibətlərin olduğu görüşün sonunda Aİ-nin Xarici İşlər və Təhlükəsizlik Siyasəti üzrə Ali Nümayəndəsi Cozep Borel və Belçikanın Xarici İşlər Naziri Hadja Lahbib mətbuata birgə açıqlamalar veriblər.

“Bütün üzv dövlətlər Türkiyə ilə daha sıx əlaqələr qurmaqda razıdır. Münaqişələrin qarşısını almaq və əməkdaşlığı artırmaq üçün Kipr məsələsini nəzərə alaraq Türkiyə ilə əlaqə saxlamalıyıq. Türkiyə ilə daha çox əlaqələr qurmalı, maraqlarımızın üst-üstə düşdüyü sahələrdə çalışmalı, bizi bir-birimizdən uzaqlaşdıran məsələlərdən qaçmalıyıq” - deyə Borel qeyd edib.

Belçikanın xarici işlər naziri Hadja Lahbib bildirib ki, Türkiyə qlobal səhnədə getdikcə daha vacib strateji tərəfdaşa çevrilir.

Məlumat üçün qeyd edək ki, 10 ölkənin Aİ-yə daxil olduğu 2004-cü il genişlənməsinin 20-ci ildönümünü qeyd etmək üçün apreldə keçirəcək tədbirə Türkiyə dəvət olunacaq.

Hafiz Rufizoğlu