Bakı. AzerVoice:
Qəzzalıları vəhşicəsinə qətlə yetirir.
AzerVoice xəbər verir ki, bu barədə Türkiyə prezidenti Rəcəb Tayyib Ərdoğan İslam Əməkdaşlıq Təşkilatının (İƏT) İnformasiya Nazirlərinin fövqəladə toplantısına videomüraciətində deyib.
"Qərb güclərinin qeyd-şərtsiz dəstəyi ilə dəstəklənən İsrail rəhbərliyi blokadada olan qəzzalıları vəhşicəsinə qətlə yetirir. Bu günə qədər 30 mindən çox fələstinli vəhşicəsinə qətlə yetirilib, 70 mindən çox fələstinli isə yaralanıb. İsrail tərəfindən öldürülən qəzzalıların böyük əksəriyyəti uşaqlar, qadınlar və qocalardır.” – deyə Ərdoğan bildirib.
O qeyd edib ki, İsrail ordusu sadəcə mülki əhalini deyil, eyni zamanda mətbuat üzvlərini də hədəf alır.
“İsrail işğalçı qüvvələri təkcə günahsız mülki insanları deyil, faktları ictimaiyyətə açıqlamağa çalışan mətbuat mənsublarını da hədəfə alır. Azad mətbuatın səsini susdurmaq üçün İsrail tərəfindən öldürülən media mənsublarının sayı 100-dən çoxdur” – deyə Ərdoğan vurğulayıb
O bildirib ki, İsrailin dezinformasiya səylərinin qarşısını almaq bizim ən mühüm vəzifəmizdir.
Qeyd edək ki, İsrailin 7 oktyabrdan bəri Qəzza zolağına təşkil etdiyi hücumlarda ən az 12 min 660-ı uşaq, 8 min 570-i qadın olmaqla, 30 min fələstinli həlak olub, 70 min nəfər isə yaralanıb.
Dağıntılar altında hələ də minlərlə ölü olduğu bildirilərkən, insanların sığındığı xəstəxana və təhsil müəssisələri hədəf alınaraq mülki infrastruktur da məhv edilir.
Qəzzada 1,9 milyon fələstinli havadan, qurudan və dənizdən edilən hücumlar səbəbilə didərgin düşüb.
İsrailin maneələri səbəbindən bölgəyə kifayət qədər yardım çatdırıla bilmir. Fələstinlilər bir tərəfdən İsrailin hücumları ilə, digər tərəfdən isə hər gün dərinləşən aclıqla mübarizə aparır.
Hafiz Rufizoğlu
