Bakı, AzerVoice
Türkiyə ilə Rusiya arasında “Barış Pınarı” Əməliyyat Bölgəsində həyata keçirilən və təhlükəsizlik səbəbiylə 5 oktyabr 2023-cü il tarixində dayandırılan Birgə Quru Patrulu yenidən başlayıb.
AzerVoice xəbər verir ki, bu barədə Türkiyə Milli Müdafiə Nazirliyi açıqlama verib.
“5 oktyabr 2023-cü il tarixinədək 344 kombinə edilmiş quru patrul xidməti həyata keçirilib və bölgədə təhlükəsizlik vəziyyəti ilə əlaqədar patrul xidməti dayandırılıb. Türkiyə və Rusiya Federasiyası tərəfindən həyata keçirilən birləşmiş quru patrul fəaliyyəti 22 avqust 2024-cü il tarixində “Barış Pınarı” Əməliyyat Bölgəsinin şərqində 4 texnika (2 Pars, 2 Kirpi-2) və 24 şəxsi heyətin iştirakı ilə yenidən başladılıb.” – deyə açıqlamada qeyd edilib.
Bildirilib ki, terrorla mübarizədə Türkiyə-Rusiya əməkdaşlığının nümayiş etdirilməsi məqsədilə birləşmiş quru patrul fəaliyyətinin növbəti dövrdə də davam etdirilməsi planlaşdırılır.
Xatırladaq ki, Türkiyə ilə Rusiya Federasiyası arasında 22 oktyabr 2019-cu il tarixində imzalanmış “Soçi Memorandumu” və onun icra prinsiplərinə uyğun olaraq “Barış Pınarı” əməliyyat zonasının qərb və şərqində birləşmiş quru patrul fəaliyyəti həyata keçirilib.
Hafiz Rufizoğlu
