BAKI,AzerVoice Analitik Təhlil Mərkəzi
Livanda Hizbullah təşkilatı Aşura mərasimlərini yalnız dini və tarixi anım olaraq deyil, siyasi və ideoloji mobilizasiya vasitəsi kimi də istifadə edir. Müşahidəçilərin fikrincə, təşkilat bu simvolik hadisəni öz ideoloji xəttinə uyğun şəkildə silahın qorunması və legitimləşdirilməsi məqsədilə yönləndirir.
Aşura – İmam Hüseynin Kərbəla şəhidliyinin ildönümü – şiə icması üçün tarixi və dini əhəmiyyət daşısa da, Hizbullah bu günü siyasi təbliğatın alətinə çevirib. Təşkilatın rəhbərliyi, xüsusilə baş katib müavini şeyx Naim Qasım, Aşura mərasimlərində verdiyi mesajlarda İsrailə qarşı müqavimət ruhunu vurğulayıb və “şəhidliklə qələbə eynidir” mesajı ilə təşkilat üzvlərini mümkün qarşıdurmalara hazırlayıb.
Bu çıxışlar ABŞ və İsrailin artan təzyiqləri fonunda baş verir. Vaşinqton və Təl-Əviv Beyrutdan Hizbullahın Litani çayının şimalında silahlarını təhvil verməsi üçün konkret cədvəl təqdim olunmasını tələb edir. ABŞ-ın Yaxın Şərq üzrə xüsusi nümayəndəsi Tom Barakın yaxın günlərdə Livana səfəri gözlənilir.
Bu arada Hizbullahın bəzi tərəfdarları Beyrutun şiələrin yaşadığı məhəllələrindən birində silahlı yürüş keçirərək açıq şəkildə silahdan vaz keçməyəcəklərini bəyan ediblər. Gənclər avtomat silahlarla yürüş edərək təşkilatın həm daxili, həm də xarici çağırışlara qarşı duruşunu nümayiş etdirməyə çalışıblar.
Maraqlıdır ki, Livan parlamentinin sədri və Hizbullahın müttəfiqi olan Nəbih Bərri silahsızlaşma ilə bağlı müsbət mesajlar versə də, təşkilata yaxın media orqanları bu bəyanatları dolayısı ilə təkzib edib. Bu isə ölkədə siyasi qeyri-müəyyənliyi daha da dərinləşdirib.
Müşahidəçilərin fikrincə, Hizbullahın Aşuranı bu şəkildə istifadə etməsi İranın bölgədəki strategiyası ilə uyğunluq təşkil edir. Bu mövqeyin məqsədi yalnız İsrailə deyil, həm də Livan daxilindəki siyasi rəqiblərə və beynəlxalq vasitəçilərə mesaj göndərməkdir: "Əgər ağır silahları təhvil versək də, ölkədə qüvvə və təsir sahibi biz qalacağıq."
Livan ictimaiyyəti isə yeni bir müharibə macərasının astanasında olduqları qorxusu ilə yaşamağa davam edir.
