BAKI, AzerVoice
“Terrordan azad Türkiyə” yolunda dönüş nöqtəsindəyik.
AzerVoice xəbər verir ki, Türkiyənin ədliyyə naziri Yılmaz Tunç PKK-nın tərksilah prosesi ilə bağlı açıqlama verərək bu tarixi mərhələnin diqqətlə izlənildiyini bildirib.
Tunç İraqın Süleymaniyyə şəhərində PKK üzvlərinin silahları məhv
etməsi ilə bağlı açıqlamasında bildirib ki, bu proses prezident
Rəcəb Tayyib Ərdoğan və MHP sədri Devlet Bahçelinin çağırışı ilə
başlayıb və “Terrordan azad Türkiyə” yolunda dönüş nöqtəsi
sayılır.
“Bu, tariximizdə unudulmayacaq bir gündür”, – deyə o qeyd edib.
Nazir prosesin dövlət orqanları tərəfindən sıx monitorinqə alındığını, hər hansı güzəşt edilmədən aparıldığını və tam koordinasiya ilə həyata keçirildiyini vurğulayıb. O, qarşıdakı mərhələdə parlamentdə komissiya yaradılacağını və burada bütün siyasi partiyaların mövqeyini ifadə edəcəyini də qeyd edib.
“Bu proses şəhidlərimizin, qazilərimizin əmanətinə hörmətlə yanaşaraq, gələcək nəsillər üçün daha təhlükəsiz və birlik içində bir Türkiyə qurmaq məqsədi daşıyır”- deyə Tunç həmçinin bildirib.
Qeyd edək ki, bu gün Süleymaniyyədə PKK-nın ilk silah buraxma mərasimi keçirilib və prosesin mərhələli şəkildə davam etdirilməsi planlaşdırılır.
