BAKI, AzerVoice, Orxan Qədirzadə
Qəzzada ABŞ, Türkiyə, Qətər və Misirin vasitəçiliyi ilə əldə olunan atəşkəsə baxmayaraq, İsrail razılaşma şərtlərini yerinə yetirmir.
AzerVoice-un məlumatına görə, atəşkəs müddətində İsrail ordusu ən azı 194 dəfə atəşkəsi pozub. Razılaşmaya əsasən Qəzzaya gündəlik 600 yük maşını humanitar yardım daxil olmalı olduğu halda, əraziyə orta hesabla cəmi 145 yük maşını buraxılır.
Girişinə icazə verilən yardımların çoxunda un, yağ kimi əsas ərzaq məhsulları əvəzinə cips, şokolad və biskvit kimi məhsulların yer aldığı bildirilir. Yerli rəsmilər bunun qəsdən edildiyini, İsrailin həyati əhəmiyyətli ərzaqları ən sona saxlayaraq yeni aclıq taktikasına əl atdığını vurğulayır.
Qəzzadakı hökumətin Media İdarəsinin müdiri İsmayıl əs-Sevabite açıqlamasında bildirib ki, Rəfah sərhəd-keçid məntəqəsinin qarşı tərəfində 6 mindən çox humanitar yardım maşını gözlədiyi halda İsrail onların girişinə imkan vermir.
Bundan başqa, razılaşmada nəzərdə tutulan 300 min çadır və konteyner evin Qəzzaya daxil edilməsinə də icazə verilmədiyi bildirilir.
