BAKI, AzerVoice, Səməd Əyyubov
Livanın ədliyyə naziri Adil Nəssar, silahlarını təhvil verməkdən imtina edən Hizbullaha xəbərdarlıq edib.
AzerVoice-un məlumatına görə, Nəssar açıqlamasında bəzi şəxslərin silahı müdafiə adı ilə Livanı məhv etməklə hədələməsinin, “bu silahlar guya ölkəni qorumaq üçündür” iddiasını tamamilə aradan qaldırdığını bildirib.
Livan parlamentinin üzvü Əşrəf Rifi isə Hizbullah lideri Naim Qasımın “hər hansı daxili qarşıdurmaya görə məsuliyyətin hökumətə aid olduğu” bəyanatına cavab olaraq, onu daxili müharibə hədəsini təkrarlamamağa çağırıb. Rifi, Qasımın partiyasının Livana işğal, humanitar böhran və iqtisadi fəlakət miras qoyduğunu, indi isə məğlubiyyətdən sonra dövləti və xalqı hədələyərək özünü qurban kimi təqdim etdiyini və əksəriyyəti xəyanətdə ittiham etdiyini vurğulayıb.
Sağçı xristian Kətaib Partiyasının deputatı Elias Hankeş, Qasımın sözlərinin “xalqın həyatını, Livanın qanuni əsaslarını və ərazi bütövlüyünü təhdid etdiyini” söyləyib.
Millət vəkili Vaddah Sadıq isə cəmiyyətin sülhünün heç bir halda şantaj vasitəsinə və ya məzhəb gərginliyi alətinə çevrilməməli olduğunu, Livanlıların həyatının hər hansı bir partiyanın, qrupun və ya məzhəbin əlində ola bilməyəcəyini qeyd edib.
Livan Qüvvələri Partiyasının millət vəkili Qeys Yəzbek bildirib ki “Naim Qasım sözləri ilə İsraillə döyüşür, əməli ilə isə Livanı məhv edir."
"Bizə hədə-qorxu gəlmə, çünki artıq ümumi bir qırğının içindəyik. Livana mərhəmət edin” - deyə, o Hizbullah liderinə səslənib.
Qeyd edək ki, Hizbullahın baş katibi Naim Qasım, İsrail işğalı davam etdiyi müddətdə silahı buraxmayacaqlarını, ABŞ–İsrail layihəsinə qarşı nə bahasına olursa olsun mübarizə aparacaqlarını bəyan edib. O, hər hansı daxili qarşıdurma və ölkənin müdafiə vəzifəsinin yerinə yetirilməməsinə görə bütün məsuliyyətin Livan hökumətinə aid olacağını bildirib. Qasım həmçinin hücumların dayandırılması və İsrailin Livandan çıxarılması tələbini irəli sürərək, milli və strateji təhlükəsizlik məsələlərinin müzakirəsi zamanı bütün asanlıqları təmin etməyə hazır olduqlarını vurğulayıb.
