BAKI, AzerVoice, Səməd Əyyubov
Qəzza zolağında səhiyyə sistemi tamamilə iflic vəziyyətinə düşüb.
AzerVoice xəbər verir ki, Fələstin Səhiyyə Nazirliyinin verdiyi məlumata görə, 2023-cü ilin oktyabr ayından bəri bölgədə davam edən müharibə nəticəsində 1 500-dən çox tibb işçisi həlak olub.
Hazırda Qəzzadakı təxminən 40 xəstəxanadan yalnız 15-i fəaliyyət göstərir və onların da əksəriyyəti qismən işləyir. Dərman çatışmazlığı kritik həddədir – lazımi preparatların yalnız 30 faizi tibb müəssisələrinə daxil olur. Nazirlik bildirib ki, indiyədək 1 590 tibb işçisi, o cümlədən azı 200 həkim münaqişənin qurbanına çevrilib.
Eyni zamanda ərzaq qıtlığı davam edir. Təxminən 300 min uşaq aclıq və qidalanma çatışmazlığı səbəbilə ölümlə üz-üzədir. Böyüklərdə anemiya geniş şəkildə yayılıb ki, bu da yaralılar üçün qan donoru tapmağı çətinləşdirir.
Qeyd edək ki, 2023-cü il oktyabrın 7-də HƏMAS-ın İsrail ərazisinə hücumundan sonra Qəzza zolağında başlayan müharibədə ölənlərin sayı 62 mini ötüb, 156 mindən çox insan yaralanıb. Bundan əlavə, aclıq səbəbilə 263 nəfər, o cümlədən 112 uşaq həyatını itirib.
Martın 2-dən bəri İsrailin qərarı ilə Qəzzaya beynəlxalq humanitar yardımın girişi tam dayandırılıb. Bütün keçid məntəqələri bağlıdır. Ərzaq yalnız ABŞ və İsrailin nəzarət etdiyi Qəzza Humanitar Yardım Fondu vasitəsilə paylanır.
