BAKI,AzerVoice
İsrailin maliyyə naziri Batseliel Smotriç Qüdsdə keçirdiyi mətbuat konfransında HƏMAS-a qarşı sərt planını açıqlayıb. O, hərəkat silahlarını təhvil vermədiyi və girovları azad etmədiyi təqdirdə Qəzza zolağının mərhələli şəkildə ilhaqına başlanılmasını təklif edib.
Smotriçin planına görə, İsrail hər həftə Qəzzanın bir hissəsini ilhaq etməli, dörd həftə ərzində zolağın böyük hissəsini tam nəzarət altına almalıdır. Bu müddətdə fələstinlilərin cənuba köçürülməsi, şimal və mərkəzi bölgələrin isə mühasirəyə alınaraq qalan HƏMAS döyüşçülərinin təslim olmağa məcbur edilməsi nəzərdə tutulur. Nazir bildirib ki, bu proses 3-4 ay ərzində başa çata bilər.
Smotriç həmçinin hər hansı atəşkəsə və ya girov mübadiləsinə qarşı çıxdığını, Qəzzaya su, elektrik və qida axınının tamamilə kəsilməsini tələb etdiyini vurğulayıb: “Qəzzada kim güllə ilə ölməsə, aclıqdan öləcək”.-deyə o qeyd edib.
HƏMASın reaksiyası
HƏMAS açıqlamasında Smotriçin sözlərini “soyqırım və kütləvi qırğın siyasətinin açıq etirafı” kimi qiymətləndirib. Hərəkat bildirib ki, bu, fələstinlilərə qarşı “məcburi köçürmə və etnik təmizləmə planının açıq sübutudur” və Beynəlxalq Cinayət Məhkəməsi ilə Beynəlxalq Ədalət Məhkəməsi qarşısında İsrail rəhbərliyini ittiham etmək üçün dəlil təşkil edir.
Açıqlamada həmçinin qeyd olunub ki, bu, təkcə fərdi radikal fikirlər deyil, artıq 23 aydır həyata keçirilən hökumət siyasətidir: ərzaq və dərmanların qarşısının alınması, yardım mərkəzlərinin bombalanması, infrastrukturun dağıdılması və əhalinin kütləvi şəkildə köçürülməsinə cəhdlər.
Beynəlxalq narahatlıq
Smotriçin çıxışı, İsrail ordusunun Qəzzə şəhəri ətrafında hücumlarını intensivləşdirdiyi və humanitar təşkilatların mülki əhalinin aqibəti ilə bağlı narahatlıqlarının artdığı bir vaxtda səslənib. BMT-nin hesablamalarına görə, Qəzzada yaşayan 2 milyondan çox insanın əksəriyyəti son iki il ərzində ən azı bir dəfə bombardmandan qaçmaq üçün evlərini tərk etməyə məcbur olub.
Smotriç baş nazir Benyamin Netanyahuya bu planı dərhal qəbul etməsi üçün müraciət edib. O, həmçinin İsrailin 2005-ci ildə çıxardığı Qəzzada yenidən məskunlaşmanı dəstəklədiyini bildirib.
Smotriçin sözlərinə görə, İsrailin Şərqi Qüdsdə təsdiqlədiyi yeni “E1” adlı yaşayış məskəni layihəsi də “Fələstin dövlətinin ideyasını dəfn etməyi” hədəfləyir.
