BAKI, AzerVoice, Səməd Əyyubov
İsrail Ordusunun Baş Qərargah rəisi Eyal Zamir Qəzza zolağında “Gideon Arabaları” əməliyyatının ikinci mərhələsinin başladığını elan edib.
AzerVoice-un məlumatına görə, o bildirib ki, əməliyyatın məqsədi müharibənin hədəflərinə çatmaq üçün döyüşlərin intensivləşdirilməsi və hərbi manevrlərin dərinləşdirilməsidir.
“Əsirlərin geri qaytarılması həm mənəvi, həm də milli vəzifədir. Biz HƏMAS-ın əsas dayaq nöqtələrinə zərbələr endirməyə davam edəcəyik və onun hər yerdə sıxışdırıldığını hiss etməsinə səbəb olacağıq” – deyə, Zamir vurğulayıb.
Baş Qərargah rəisi əlavə edib ki, orduda dünəndən etibarən genişmiqyaslı ehtiyat qüvvələrinin səfərbərliyinə başlanılıb. Onun sözlərinə görə, İsrail ordusu “ölkə tarixinin ən böyük sınaqlarından bəziləri ilə üz-üzədir” və “düşmən ərazisinin dərinliklərində cəsarət, qətiyyət və fədakarlıqla” fəaliyyət göstərir.
Qeyd edək ki, Zamirin açıqlaması onun Qəzza şəhərinə səfəri zamanı səslənib. O, Cənub bölgəsinin komandanı general Yaniv Asor, 162-ci diviziya, “Givati” briqadası, 401-ci və 215-ci briqadaların komandirləri ilə birgə əməliyyat vəziyyəti və hərbi planlarla tanış olub.
