BAKI, AzerVoice, Səməd Əyyubov
İsrail ordusunun Qəzzaya son 24 saat ərzində həyata keçirdiyi hücumlarda 87 fələstinli həlak olub, 409 nəfər isə yaralanıb.
AzerVoice xəbər verir ki, səhiyyə mənbələrinin verdiyi məlumata görə, İsrail ordusu Qəzza zolağının şimalında yerləşən Qəzza şəhərinin müxtəlif ərazilərində insanları, evləri, çadırları və sığınacaqları hədəfə alıb.
İsrail Hərbi Hava Qüvvələrinə məxsus təyyarələr şəhərin mərkəzində yerləşən Əl-Yermuk Stadionu yaxınlığında məcburi köçkünlərin sığındığı Əl-Farabi Məktəbini vurub. Hücum nəticəsində 8 nəfər həlak olub, çox sayda insan yaralanıb.
Qəzza şəhərinin şimalındakı Şeyx Radvan məhəlləsində bir evə edilən hücumda isə aralarında uşaqların da olduğu dörd nəfər həlak olub, çox sayda insan yaralanıb. İsrailə məxsus pilotsuz uçuş aparatının (PUA) Yasama Qovşağı yaxınlığında sığınmacılara aid çadırı hədəfə alması nəticəsində isə iki uşaq həlak olub, yaralananlar var.
Şahidlərinin sözlərinə görə, İsrail ordusu Qəzza şəhərinin şərqində yerləşən Şücaiyyə məhəlləsinə həm havadan, həm də qurudan hücumlar həyata keçirib.
Xatırladaq ki, bundan əvvəl Qəzza zolağında son sutka ərzində aclıqdan ölənlərin sayının 387-ə çatdığı bildirilmişdi.
