BAKI,AzerVoice
ABŞ Prezidenti Donald Tramp açıqlayıb ki, Qazaxıstan “İbrahim Razılaşmalarına” qoşulacaq. Bu razılaşmalar İsraillə müsəlman əksəriyyətli ölkələr arasında diplomatik əlaqələrin normallaşdırılmasını nəzərdə tutur.
Trampın sözlərinə görə, qərar onun İsrailin Baş naziri Benyamin Netanyahu və Qazaxıstan Prezidenti Qasım-Jomart Tokayevlə keçirdiyi telefon danışığından sonra qəbul edilib.
“Tezliklə rəsmi imzalanma mərasimi keçiriləcək. Bundan başqa, bir çox ölkələr də bu güc klubuna qoşulmaq istəyir.”-deyə ABŞ lideri “Truth Social” platformasında yazıb.
Qazaxıstanın artıq İsraillə diplomatik və iqtisadi əlaqələrinin mövcud olmasına baxmayaraq, bu addımın əsasən simvolik məna daşıdığı bildirilir.
Tramp cümə axşamı Ağ Evdə Tokayev və Mərkəzi Asiyanın digər dörd lideri ilə görüş keçirib. ABŞ bu addım vasitəsilə Rusiyanın ənənəvi təsir dairəsində olan regionda və Çinin artan nüfuzu fonunda öz mövqelərini gücləndirməyə çalışır.
