BAKI, AzerVoice, Nailə Babazadə
İsrailin müdafiə naziri İsrail Kats bu gün cümə günü bəyan edib ki, Qəzza zolağında HƏMAS-a məxsus bütün tunellərin “sonuncu tunelədək” tamamilə məhv edilməsi üçün orduya göstəriş verib.
AzerVoice xəbər verir ki, Kats sosial şəbəkə “X”dəki hesabında yazıb: “Əgər tunellər olmasa, HƏMAS da olmayacaq”. Bu barədə İsrailin “Yedioth Ahronoth” qəzeti məlumat yayıb.
Nazir ötən ay açıqlamasında bildirmişdi ki, “Qəzzanın silahsızlaşdırılması” yalnız silahların müsadirəsi ilə məhdudlaşmır, həm də “HƏMAS tunel şəbəkəsinin tamamilə ləğvini” nəzərdə tutur. O bildirib ki, xüsusilə İsrailin nəzarət etdiyi “sarı zona”da bu məsələnin ordunun əsas prioritetinə çevrilməsi ilə bağlı göstəriş verib.
İsrail ordusunun oktyabr ayında yaydığı qiymətləndirmələrə görə, HƏMAS döyüşçülərinin bir hissəsi hələ də sektorun şərq hissəsində, tunellərdə gizlənir. Bu ərazi İsrailin nəzarətində olan Qəzza zolağının təxminən 53 faizini təşkil edir.
