BAKI,AzerVoice
İraqda seçkilərdə qalib gəlmiş şiə partiyaları hazırda “Həşd əl-Şaabi” və İrana yaxın silahlı qrupların gələcəyi ilə bağlı həssas müzakirələr aparır. Prosesi həm daxili siyasi ziddiyyətlər, həm də xarici təzyiqlər çətinləşdirir.
Məlumata görə, yekun qərar yalnız “Tənzimləyici Çərçivə” (İttihad əl-İtar) koalisiyası daxilində konsensus, eləcə də Tehranın razılığı ilə mümkün olacaq. Paralel şəkildə, Vaşinqtonla aparılan qeyri-rəsmi danışıqlarda ABŞ tərəfi təhlükə mənbələrinin aradan qaldırılmasını əsas şərt kimi irəli sürür.
Hazırda masada üç əsas ssenari müzakirə olunur:
“Həşd”in dövlət strukturlarına tam inteqrasiyası
— Qüvvələrin Müdafiə Nazirliyinə mərhələli şəkildə tabe edilməsi.
Tərkibin və maliyyə xərclərinin azaldılması
— Nəzarət mexanizmlərinin gücləndirilməsi, silahlı dəstələrin sayının optimallaşdırılması.
Siyasi təsirdən ayrılma və yalnız vahid hərbi komandanlığa tabeçilik
— Fəaliyyətin siyasi partiyalardan tam şəkildə uzaqlaşdırılması.
Lakin fraksiyalar arasında fikir ayrılıqları hələ də ciddi maneə olaraq qalır. Mənbələr bildirir ki, istənilən icra addımı üçün Tehran tərəfindən “yaşıl işıq” vacibdir, bəzi şiə partiyaları isə mövzunun yeni hökumət proqramına daxil edilməsinə hazırdır.
