BAKI, AzerVoice, Orxan Qədirzadə
İraqda İranmeylli Koordinasiya Çərçivəsi yeni baş nazirin seçilməsi ilə bağlı danışıqları davam etdirir. Alyans konstitusion müddətlərə əməl olunacağını bəyan etsə də, daxilindəki fikir ayrılıqları prosesi uzada bilər. Hazırkı Baş nazir Məhəmməd Şiya əs-Sudaninin ikinci müddət üçün vahid namizəd kimi irəli sürülməsi məsələsində də tam razılıq yoxdur.
AzerVoice xəbər verir ki, Sudaninin rəhbərlik etdiyi Tikinti və İnkişaf koalisiyası çərşənbə axşamı keçirilən iclasdan sonra onun yenidən baş nazir postuna namizədliyini dəstəklədiyini açıqlayıb. Koalisiya bildirib ki, yeni hökumət siyasi, iqtisadi və təhlükəsizlik sahələrində qarşıdakı əsas problemləri həll etməyə hazır olmalıdır.
Baş nazir postu uğrunda 5–6 əsas namizəd var. Əsas rəqiblər arasında Sudani, sabiq baş nazir Nuri əl-Maliki və Əbdül-Hüseyn Əbtanın adı çəkilir. Sudani ilə Maliki bir-birinin namizədliyinə etiraz edən fiqurlar kimi tanınır.
Koordinasiya Çərçivəsi hazırda şiə dini rəhbərliyi, eləcə də kürd və sünni siyasi qüvvələrinin mövqelərini öyrənir. Mənbələrin bildirdiyinə görə, Nəcəfdəki ali dini rəhbərlik və Müqtəda əs-Sədr prosesə qarışmaq istəmir, lakin kürd və sünni bloklar aktiv şəkildə iştirak edir.
Ekspertlər qeyd edir ki, fikir ayrılıqları normaldır və bu cür çətinliklər daha əvvəl də yaşanıb. Bölünmələrin Federal Ali Məhkəmə seçki nəticələrini təsdiqləyənə qədər davam etməsi mümkündür. Nəticələr təsdiqləndikdən sonra parlament spiker və müavinini seçəcək, ardınca prezident müəyyənləşəcək. Prezident isə 15 gün ərzində nümayəndə sayı çox olan parlament blokunun namizədini hökumət qurmaqla vəzifələndirəcək. Hazırda bu status Koordinasiya Çərçivəsinə məxsusdur.
Alyans liderləri, o cümlədən Sudani və Maliki, bazar ertəsi keçirilən toplantıda konstitusion müddətlərə əməl edəcəklərini bir daha təsdiqləyiblər.
