BAKI, AzerVoice, Nailə Babazadə
İsrail döyüş təyyarələri Livanın cənubunda bir neçə ərazini hədəf alıb.
AzerVoice xəbər verir ki, məlumata görə, İsrail 27 noyabr 2024-cü ildə əldə olunmuş atəşkəs razılaşmasına baxmayaraq Livana qarşı hücumlarını davam etdirir.
İsrail təyyarələri cənubdakı Ansar və Zarariye qəsəbələri arasındakı bölgə ilə yanaşı Ukmata Obası, Reyhan bölgəsi və Kıferva ilə İzze qəsəbələri arasındakı əraziləri hədəf alıb. Sosial şəbəkələrdə yayılan görüntülərdə hücumdan sonra bəzi hədəflərdən dumanların yüksəldiyi müşahidə olunub.
Livan rəsmilərindən hücumlar və mümkün insan itkiləri barədə hələ rəsmi açıqlama verilməyib. İsrail ordusundan verilən açıqlamada isə, Livanın cənubuna endirilən hava zərbələrinin Həşbullahı hədəflədiyi iddia olunub.
Hədəflərin silah anbarları və hərbi infrastrukturu əhatə etdiyi bildirilib. İsrailin hücum etdiyi bölgələrdən birində Həşbullahın Rıdvan Qüvvələrinə aid təlim düşərgəsinin vurulduğu iddia edilib.
Qeyd edək ki, İsrail 2023-cü ilin oktyabrında Livana qarşı genişmiqyaslı hücumlara başlayıb və 2024-cü ilin sentyabrında bu qarşıdurma böyük savaş səviyyəsinə çatıb. Savaş zamanı 4 mindən çox insan həlak olub, təxminən 17 min nəfər yaralanıb.
27 noyabr 2024-cü ildə Livan və İsrail arasında əldə olunmuş atəşkəs razılaşmasına baxmayaraq, İsrailin minlərlə dəfə atəşkəsi pozduğu bildirilib.
İsrail 2023-cü ilin 8 oktyabrından sonra Livanda ələ keçirdiyi 5 təpəni hələ də işğal altında saxlayır və uzun illərdir nəzarət etdiyi bəzi bölgələrdəki mövqelərini qoruyur.
Livan Səhiyyə Nazirliyi məlumat verib ki, atəşkəsi pozan İsrail 27 noyabr 2024 – 20 noyabr 2025 tarixləri arasında Livana etdiyi hücumlarda 331 nəfərin ölümünə, 945 nəfərin yaralanmasına səbəb olub.
