BAKI,AzerVoice, Orxan Qədirzadə
Hələb şəhərində Suriya hökumət qüvvələri ilə kürd yönümlü və ABŞ tərəfindən dəstəklənən Suriya Demokratik Qüvvələri (SDQ) arasında silahlı toqquşmalar baş verib.
AzerVoice xəbər verir ki, Suriya dövlət xəbər agentliyi SANA-nın məlumatına görə, qarşıdurmalar nəticəsində azı üç mülki şəxs və bir hərbçi həlak olub, doqquz nəfər isə yaralanıb.
Məlumata əsasən, SDQ qüvvələri Hələbin şərqində yerləşən Deyr Hafər ərazisində hərbi nəzarət-buraxılış məntəqəsinə pilotsuz uçuş aparatları ilə hücum edib. Hadisə nəticəsində üç hərbçi yaralanıb. Daha sonra Hələbin Şeyx Məqsud və Əşrəfiyyə rayonlarında ağır silahlardan atəş səsləri və intensiv döyüşlər qeydə alınıb.
Suriya Müdafiə Nazirliyi bəyan edib ki, baş verənləri “təcavüz aktı” kimi qiymətləndirir və buna “uyğun şəkildə cavab veriləcək”.
SANA-nın son məlumatına görə, SDQ tərəfindən həyata keçirildiyi bildirilən artilleriya atəşi nəticəsində Hələb şəhərində üç mülki şəxs ölüb, doqquz nəfər yaralanıb. Həlak olanlar arasında iki qadının olduğu qeyd edilir.
Hələb Kənd Təsərrüfatı İdarəsinin mətbuat xidmətinin məlumatına görə, SDQ tərəfindən atılan mərmi vilayətin kənd təsərrüfatı idarəsinin binasına düşüb və nəticədə doqquz əməkdaş xəsarət alıb.
Daha əvvəl dövlət mediası toqquşmalar zamanı hökumət qüvvələrinin bir üzvünün həlak olduğunu bildirmişdi.
Suriya dövlət televiziyası iki qadının və bir uşağın mülki yaşayış məntəqəsinə düşən mərmi nəticəsində zərər gördüyünü, məsuliyyətin SDQ-nin üzərində olduğunu açıqlayıb. SDQ isə yayımladığı bəyanatda bu iddianı rədd edərək, mərminin Dəməşq hökumətinə bağlı silahlı qruplar tərəfindən atıldığını və əl-Midan rayonuna düşdüyünü bildirib.
Məlumata görə, ağır döyüşlər əsasən kürdlərin kompakt yaşadığı Əşrəfiyyə və Şeyx Məqsud rayonlarında cəmləşib. İlk dəfə olaraq tərəflərin pilotsuz uçuş aparatlarından geniş şəkildə istifadə etdiyi bildirilir.
Hökumət mənbələri SDQ-nin təkcə təhlükəsizlik qüvvələrini deyil, həm də yaşayış məntəqələrini hədəf aldığını iddia edir. Bunun fonunda Suriya hökuməti Şeyx Məqsud və Əşrəfiyyə ətrafındakı bəzi yaşayış sahələrinin təxliyəsinə başlayıb.
Qarşıdurmalar SDQ rəhbərliyinin iki gün əvvəl Dəməşqdə Suriya hökumətinin yüksəkvəzifəli nümayəndələri ilə keçirdiyi görüşdən sonra baş verib. Tərəflər mart ayında imzalanmış razılaşmaya əsasən SDQ-nin Suriya ordusuna inteqrasiyası məsələsini müzakirə etsə də, danışıqlarda ciddi irəliləyiş əldə olunmayıb.
Analitiklərin fikrincə, SDQ-nin ölkə ərazisinin təxminən üçdə birinə, eləcə də əsas enerji və kənd təsərrüfatı resurslarına nəzarət etməsi gərginliyi daha da artırır. Xüsusilə Suriyanın iqtisadi mərkəzi sayılan Hələbdə silahlı qrupların mövcudluğu hökumətin investisiya cəlb etmək və müharibədən sonra iqtisadi bərpanı sürətləndirmək planlarını çətinləşdirir.
