BAKI, AzerVoice, Nailə Babazadə
İsrail ordusu Qəzza zolağında əldə olunmuş atəşkəs razılaşmasına baxmayaraq bölgənin cənub, şimal və mərkəzi hissələrinə hava və artilleriya zərbələri endirməkdə davam edir.
AzerVoice xəbər verir ki, 10 oktyabr 2025-ci il tarixində qüvvəyə minən atəşkəs razılaşmasına rəğmən, İsrail qüvvələrinin hücumları səngimək bilmir. Yerli mənbələrdən alınan məlumata görə, Qəzzanın cənubunda yerləşən Xan Yunus şəhərinin şərq rayonları döyüş təyyarələri və artilleriya atəşinə tutulub. Eyni zamanda bölgənin mərkəzi hissəsindəki Deyr əl-Bəlah şəhərinin şərq əraziləri də intensiv zərbələrə məruz qalıb.
İsrail ordusunun hücumları Qəzza şəhərinin şərqindəki Tuffah məhəlləsini də əhatə edib. Burada həm havadan, həm də qurudan silsilə zərbələr qeydə alınıb. Cibaliya qəsəbəsində isə hədəf seçilmədən ətrafa atəş açıldığı bildirilir. Humanitar təşkilatlar atəşkəsin pozulmasının bölgədəki onsuz da ağır olan vəziyyəti daha da gərginləşdirdiyini və mülki əhali arasında itkilərin artmasına səbəb olduğunu vurğulayırlar.
