BAKI, AzerVoice, Nailə Babazadə
HƏMAS hərəkatı İsrail həbsxanalarında saxlanılan fələstinlilərin beynəlxalq birliyin səssizliyi fonunda insanlıq dışı rəftara məruz qaldığını bəyan edib.
AzerVoice xəbər verir ki, HƏMAS tərəfindən yayımlanan yazılı açıqlamada fələstinli məhbusların sistematik işkəncə, pis rəftar və ağır həyat şəraiti ilə üz-üzə olduğu bildirilir. Hərəkat beynəlxalq ictimaiyyəti bu acılara son qoymaq üçün təcili hərəkətə keçməyə çağırıb. Açıqlamada qeyd olunur ki, həbsxanalarda tətbiq edilən fiziki və psixoloji təzyiqlər, qəsdən tibbi laqeydlik və ailə görüşlərinə qoyulan qadağalar insanlıq vicdanını sarsıdan həddə çatıb.
Fələstinli mənbələrin verdiyi məlumata görə, hazırda İsrail həbsxanalarında 9 min 300-dən çox fələstinli saxlanılır ki, onların da 3 min 385-i heç bir ittiham irəli sürülmədən "inzibati həbs" rejimindədir. Xüsusilə 2023-cü ilin oktyabrından bəri Qəzzadan gətirilən əsirlərə qarşı aclıq, cinsi zorakılıq və tibbi yardımdan məhrum etmə hallarının artdığı vurğulanır. Həmas Birləşmiş Millətlər Təşkilatını və insan hüquqları təşkilatlarını İsrail həbsxanalarına məhdudiyyətsiz giriş əldə etməyə və vəziyyəti yerində araşdırmağa səsləyib.
