BAKI,VOA, Nailə Babazadə
İsrail hərbi təyyarələrinin Livanın cənubunda yerləşən Nəbatiyə şəhərinə bağlı Cəbşit qəsəbəsinə endirdiyi hava zərbələri nəticəsində 6 nəfər həyatını itirib. Ölənlərdən 4-nün eyni ailənin üzvləri olduğu bildirilir.
VOA xəbər verir ki, Livanın rəsmi xəbər agentliyi NNA-nın yaydığı məlumata görə, İsrail hərbi təyyarələri Cəbşit qəsəbəsində bir neçə hava hücumu həyata keçirib. Hücum nəticəsində 6 nəfər həlak olub, onlardan 4-ü eyni ailənin üzvləri olub.
Bildirilir ki, İsrail təyyarələri səhər saatlarında qəsəbədə başqa bir yaşayış evini də hədəfə alıb. Hücum nəticəsində həmin ev tamamilə dağılıb.
Hava zərbələri zamanı qəsəbə mərkəzi, bir çox iş yerləri, bələdiyyə binası, yaşayış evləri və park edilmiş avtomobillər ciddi zərər görüb. Hücum nəticəsində qəsəbədə yerləşən İslam Qurumu Mərkəzi və bəzi təcili yardım maşınlarının da dağıdıldığı bildirilib.
Livan Səhiyyə Nazirliyi İsrailin ötən gündən bəri ölkənin müxtəlif bölgələrinə endirdiyi hava zərbələri nəticəsində onlarla insanın həyatını itirdiyini, çox sayda şəxsin isə yaralandığını açıqlayıb.
