BAKI,VOA

İsrailin "Kanal 15" televiziyası ordu dairələrindəki mənbələrə istinadən, ölkənin Hərbi Hava Qüvvələri daxilində İranın xeyrinə fəaliyyət göstərən casus şəbəkəsinin ifşa olunduğunu xəbər verib.

Məlumata görə, İsrail HHQ-də xidmət edən bir qrup hərbi qulluqçu İran kəşfiyyatı ilə əməkdaşlıq etməkdə şübhəli bilinərək saxlanılıb. Faktla bağlı aparılan araşdırmalar nəticəsində uzun müddətdir Tehranın xeyrinə casusluq fəaliyyəti göstərən nizami hərbi qulluqçular (müddətli və ya peşəkar əsgərlər) həbs edilib.

Mənbələr vurğulayır ki, casusluq şəbəkəsinin əsas hədəfi HHQ-nin gizli əməliyyat planları, hərbi bazaların koordinatları və texnoloji sirləri barədə məlumat toplamaq olub. Hazırda İsrail təhlükəsizlik xidmətləri casusluq fəaliyyətinin miqyasını və sızdırılan məlumatların strateji əhəmiyyətini araşdırmağa davam edir.