BAKI,VOA, Nailə Babazadə
Suriya Prezidenti Əhməd Əş-Şəraa, “Dörd Dəniz və Doqquz Koridor” təşəbbüsü ilə Suriyanın Orta Asiya və Körfəz regionunu Avropanın mərkəzinə bağlayan təhlükəsiz və alternativ bir marşrut olduğunu vurğulayıb.
VOA xəbər verir ki,Kiprin paytaxtı Nikosiyada keçirilən Avropa İttifaqı və Regional Tərəfdaşların Toplantısında çıxış edən Prezident Əş-Şəraa bildirib ki, bu görüş ənənəvi əməkdaşlıq çərçivələrini aşan yeni bir geosiyasi reallığı təsdiqləyir və strateji yetkinlik anını təmsil edir.
Görüşdən sonra təşkil edilən mətbuat konfransında danışan dövlət başçısı Aralıq dənizinin ortaq sahilində yerləşmənin Avropanın təhlükəsizliyi ilə regionun sabitliyini bölünməz bir tarazlığa çevirdiyini qeyd edib. O, Hörmüz boğazının bağlanma riskinin böyük təhdid yaratdığını və buna görə də regionun daxilindən strateji həllər istehsal edilməsinin zəruriliyini vurğulayıb:
“Avropanın Suriyaya ehtiyacı, Suriyanın Avropaya olan ehtiyacı qədərdir. Avropa-Ərəb-Aralıq dənizi tərəfdaşlığı enerji axınının davamlılığı və qlobal təchizat təhlükəsizliyi üçün qaçılmaz bir yol və təhlükəsiz sığınacaq halına gəlib”.
Prezident Əş-Şəraa İsrailin Suriya suverenliyinə qarşı quru müdaxilələri və hava hücumlarının 1974-cü il hərbi razılaşmasına və beynəlxalq hüquqa zidd olduğunu bildirərək beynəlxalq birliyi məsuliyyət daşımağa çağırıb. O qeyd edib ki, bu hücumlar təkcə təhlükəsizliyi deyil, həm də yenidənqurma prosesini hədəf alır.
Suriyanın artıq münaqişə meydanı deyil, həll körpüsü olmağı seçdiyini qeyd edən dövlət başçısı yeni təşəbbüsü belə izah edib:
“Coğrafiya taleyimiz, tərəfdaşlıq isə qərarımızdır. Bu anlayışla Aralıq dənizi və Ərəb Körfəzindəki tərəfdaşlarımızın xidmətinə ‘Dörd Dəniz və Doqquz Koridor’ təşəbbüsünü təqdim edirik. Bu təşəbbüslə Suriya Orta Asiya və Körfəzi Avropanın qəlbinə bağlayan şah damarı təmsil edir”.
Nikosiyadakı təmasların 11 mayda Brüsseldə keçiriləcək “Yüksək Səviyyəli Suriya-Avropa Siyasi Dialoqu” üçün bir başlanğıc olduğunu qeyd edən Əş-Şəraa, önlərindəki 17 günlük müddətdə intensiv iş aparılacağını bildirib.
Qeyd edək ki, Suriya Prezidenti Kipr Prezidenti Nikos Xristodulidis və Avropa İttifaqı Şurasının sədri Antonio Kostanın dəvəti ilə bu əhəmiyyətli toplantıda iştirak edib.
