BAKI,VOA, Orxan Qədirzadə
İordaniyadan Suriyaya könüllü şəkildə qayıdan suriyalı qaçqınların sayı 200 min nəfərə çatıb. Bu barədə Birləşmiş Millətlər Təşkilatının Qaçqınlar üzrə Ali Komissarlığının İordaniya nümayəndəliyinin təmsilçisi Yusif Taha məlumat verib.
20 iyun – Ümumdünya Qaçqınlar Günü münasibətilə İordaniyanın dövlət televiziya kanallarından birinə müsahibə verən Yusif Taha 2024-cü il dekabrın 8-dən sonra suriyalı qaçqınların vətənlərinə qayıdışı ilə bağlı prosesdən danışıb.
Onun sözlərinə görə, cari ilin əvvəlindən indiyədək İordaniyadan Suriyaya 23 min 150 nəfər qayıdıb. Təkcə iyunun 1-dən 13-dək olan dövrdə isə təxminən 2 min 500 nəfər vətəninə dönüb.
Yusif Taha bildirib ki, könüllü geri dönüş prosesi davam edir və geri qayıdanların 51 faizini kişilər təşkil edir.
Məlumata görə, Suriyaya qayıdanların 58 faizi ailə üzvləri ilə birlikdə vətənə dönüb. Qaçqınların 42 faizi isə Suriyaya təkbaşına qayıtmağa üstünlük verib. Eyni zamanda, geri dönənlərin 24 faizi əvvəllər qaçqın düşərgələrində yaşayırdı.
Birləşmiş Millətlər Təşkilatının Qaçqınlar üzrə Ali Komissarlığının nümayəndəsi qeyd edib ki, hazırda İordaniyada 400 mindən çox qaçqın yaşayır. Onların 380 minini Suriya vətəndaşları təşkil edir.
Təşkilatın ölkədə qalan qaçqınlara dəstək göstərmək fəaliyyətini davam etdirdiyi vurğulanıb.
Qeyd edək ki, 2024-cü il dekabrın 8-də Suriya müxalif qüvvələri paytaxt Dəməşqə daxil olduqlarını elan etmiş və ölkədə uzun illər hakimiyyətdə olan Bəəs rejiminin devrildiyini bildirmişdilər. Bəşşar Əsədin rəhbərlik etdiyi hakimiyyət ölkəyə onilliklər ərzində nəzarət edib.
