BAKI, VOA, Fərid Mikayılov

İsrailin Baş naziri Benyamin Netanyahu ABŞ Prezidenti Donald Trampın İsrail ordusunun Suriya, Livanın cənubu və Qəzza zolağında nəzarətdə saxladığı ərazilərdən geri çəkilməsi ilə bağlı tələbinə qarşı çıxacağını açıqlayıb.

VOA xəbər verir ki, Netanyahu ABŞ-a səfəri ərəfəsində keçirilən həftəlik Nazirlər Kabinetinin iclasında Vaşinqtonun bu mövqeyini qəbul etməyəcəyini bildirib.

Onun sözlərinə görə, İsrail ordusu Qəzza zolağındakı "Sarı Hat" xəttində tam nəzarəti qoruyacaq və geri çəkilmə baş verməyəcək.

İsrail hökuməti həmçinin Beynəlxalq Sabitlik Qüvvəsinin (ISF) ölkəyə yerləşdirilməsi ilə bağlı yeni şərtləri də açıqlayıb. Bildirilib ki, hazırda ISF tərkibində yalnız İsrailin dost ölkələri hesab edilən Uqanda və Mərakeşdən təxminən 200 nümayəndə fəaliyyət göstərir.

Kabinet qərarına əsasən, ISF qüvvələrinin İsrailə girişinə yalnız baş nazir, müdafiə naziri və xarici işlər nazirinin razılığı ilə icazə veriləcək. Bundan əlavə, missiyada iştirak edəcək ölkələrin İsraillə sülh razılaşmasına malik olması və beynəlxalq səviyyədə ölkəyə və ya onun rəsmi şəxslərinə qarşı hər hansı hüquqi və ya siyasi fəaliyyət göstərməməsi əsas şərt kimi müəyyənləşdirilib.

Qeyd olunur ki, 10 oktyabr 2025-ci ildə Qəzza zolağında atəşkəs qüvvəyə minsə də, İsrail bölgədə hərbi əməliyyatları, dağıntıları və blokadanı davam etdirir. Məlumatlara görə, hazırda Qəzza ərazisinin təxminən 70 faizi İsrailin nəzarətindədir, fələstinlilər isə ərazinin cəmi 30 faizini təşkil edən məhdud zonada yaşayırlar.

İsrail mətbuatının məlumatına görə, Vaşinqton son dövrlərdə Təl-Əvivdən Suriya, Livanın cənubu və Qəzza zolağında nəzarətdə saxladığı ərazilərdən geri çəkilməsini tələb edir. Benyamin Netanyahunun isə sabah Vaşinqtonda ABŞ Prezidenti Donald Trampla bu məsələni müzakirə edəcəyi gözlənilir.