Bakı. AzerVoice:
Avropa Parlamentinin üzvü Kler Deli İsrailin beynəlxalq idman yarışlarından uzaqlaşdırılmasını istəyib.
AzerVoice xəbər verir ki, K.Deli bu barədə öz rəsmi X sosial şəbəkə hesabında paylaşım edib.
"Qəzzada heç bir işlək xəstəxana, məscid, kilsə, kitabxana, məktəb, universitet və çörəkxana qalmayıb. Bu sürətlə qəddar İsrail rejimi tezliklə Qəzzada həyatın hər sahəsini, o cümlədən idmanı məhv edəcək", - deyə o vurğulayıb.
O, məsələ ilə bağlı Beynəlxalq Olimpiya Komitəsi, FİFA, UEFA və FİBA-ya imza müraciətlərini dəstəklədiyini bildirib.
Qeyd edək ki, oktyabrın 7-də İsrailə hücumlar olunub. Əvvəlcə Qəzza bölgəsindən reaktiv mərmilərlə kütləvi atəş açılıb, daha sonra döyüşçülər əraziyə qurudan, havadan və sudan daxil olublar.
İsrail müharibə vəziyyəti elan edib. Bundan başqa, İsrailin müdafiə naziri Yoav Qallant ehtiyatda olan hərbçilərin kütləvi çağırışını elan edib.
Oktyabrın 7-də İsrail-Fələstin münaqişəsinin yeni mərhələsi başlayandan bəri Qəzza zolağında ölənlərin sayı 28 min 576 nəfərə çatıb.
