BAKI, AzerVoice
ABŞ Prezidenti Donald Tramp Ukraynada 30 günlük atəşkəsi nəzərdə tutan və “istəkli ölkələr koalisiyası” tərəfindən irəli sürülən təşəbbüsü dəstəklədiyini bildirib.
AzerVoice xəbər verir ki, bu barədə Politico qəzeti məlumat yayıb.
Ötən gün Fransa Prezidenti Emmanuel Makron, Almaniya Kansleri Fridrix Merts, eləcə də Böyük Britaniyanın Baş naziri Kir Starmer və Polşanın Baş naziri Donald Tusk Kiyevə səfər ediblər. Onlar Ukrayna rəhbərliyi ilə apardıqları danışıqlarda mayın 12-dən etibarən 30 günlük atəşkəsin elan olunmasına dair təklifini irəli sürüblər.
Məlumata görə, Kiyevdə keçirilən üç saatlıq danışıqlar zamanı Makron şəxsi təşəbbüsü ilə Trampa birbaşa zəng edərək müzakirələrin gedişi barədə məlumat verib. Vaxt fərqinə baxmayaraq, Tramp zəngə cavab verib və Avropa təşəbbüsünü dəstəklədiyini bildirib. Bununla belə, ABŞ Prezidenti sonradan bu telefon danışığını ictimai şəkildə xatırlatmayıb və bu barədə hər hansı açıqlama verməyib.
“Kiyevdə iştirak edən iki Avropa rəsmisi görüşün nəticələrini böyük uğur kimi qiymətləndiriblər, xüsusilə Trampın prosesə cəlb olunması və onun dəstəyinin əldə edilməsi kontekstində. Lakin onlardan biri xəbərdarlıq edib ki, ABŞ Prezidenti fikrini sürətlə dəyişmək meyli ilə tanınır” - deyə, nəşrin yayımladığı materialda qeyd olunur.
