BAKI, AzerVoice
Son üç ildə ABŞ ordusu, hərbi xidmətə yeni əsgərlərin cəlb olunması və mövcud heyətin saxlanması üçün 6 milyard dollardan çox vəsait xərcləyib.
AzerVoice xəbər verir ki, barədə "Associated Press" agentliyi məlumat yayıb.
Məlumata əsasən, 2022-ci ildən başlayaraq ABŞ ordusu, donanması, hava qüvvələri və dəniz piyadalarında yenidən xidmətə cəlb olunanlar üçün verilən maliyyə təşviqləri ciddi şəkildə artırılıb. Bu artımda ABŞ donanması digər qoşun növlərindən daha çox xərcləmə edib. Eyni zamanda, ordu və dəniz piyadaları da bonus məbləğlərini yüksəldib.
Əvvəllər də hərbi qüvvələr bonuslarla əsgər cəlb etməyə çalışsalar da, COVID-19 pandemiyası dövründə gənclərlə birbaşa təmasın məhdudlaşması, məsələn, məktəb ziyarətləri və sərgilərin ləğvi, bu prosesi daha da çətinləşdirib. Bu səbəbdən də bonus və əlavə proqramlara daha çox vəsait ayrılıb.
Yeni proqramlar, uyğunluq şərtlərində dəyişikliklər və motivasiyaedici bonuslar sayəsində ordu sıralarına qayıdan əsgərlərin sayı artıb. Ötən il ABŞ ordusunun bütün qoşun növləri donanma istisna olmaqla planlaşdırılan çağırış kvotalarını yerinə yetirə bilib.
ABŞ Prezidenti Donald Tramp və Müdafiə naziri Pit Heqset bu canlanmanı seçki qələbələrilə əlaqələndirsələr də, rəsmilər çağırışın artmasının əsas səbəbini ordu tərəfindən həyata keçirilən struktur islahatlarda, xüsusilə də maliyyə təşviqlərinin artırılmasında görürlər.
ABŞ Donanmasının əməliyyatlar üzrə rəis müavini admiral Ceyms Kilbi Senatda çıxış edərək bildirib ki, donanma ən bacarıqlı heyəti saxlamaq istəyir. O, bəzi sahələrdə, xüsusilə aviasiya, xüsusi əməliyyatlar, sualtı qayıqlar və hərbi tibb sahəsində zabitlərin yenidən cəlb olunmasının çətin olduğunu bildirib.
Son on ildə ən böyük çağırış çətinliyini ABŞ ordusu yaşayıb. Amma 2022-ci ilin avqustunda Cənubi Karolina ştatında yerləşən Fort Ceksonda qurulan “Gələcək əsgərin hazırlıq kursu” proqramı sayəsində çağırışda ciddi irəliləyiş qeydə alınıb. Bu proqram fiziki və akademik göstəriciləri zəif olan namizədlərə hərbi standartlara çatmaq üçün 90 günə qədər əlavə hazırlıq imkanı verir.
ABŞ Hava Qüvvələri 2023-cü ildə dəstək məqsədilə bonus xərclərini artırsa da, ötən il bu məbləğ azaldılıb. Bonuslar əsasən silah sistemləri, təyyarə texniki xidməti və təhlükəsizlik sahələrinə yönəldilib. Kosmik Qüvvələr isə hal-hazırda çağırış bonusları vermir.
Dəniz Piyadaları və Kosmik Qüvvələr, daha kiçik birliklər olmalarına baxmayaraq, çağırış planlarını uğurla yerinə yetirə biliblər. Dəniz Piyadaları daha az vəsaitlə daha çox əsgər cəlb etmək məqsədilə bonusları daha geniş yayılmış şəkildə bölüşdürür.
Bütün qoşun növləri bu vəsaitləri xüsusilə kiber təhlükəsizlik, kəşfiyyat, xüsusi əməliyyatlar, artilleriya və zirehli birliklər kimi çətin doldurulan sahələrə yönəldirlər.
