BAKI, AzerVoice

İspaniya İsrailin "Rafael" şirkətindən 168 tank əleyhinə buraxılış qurğusu və 1680 tank əleyhinə raket alınmasına dair müqaviləni ləğv edib.

AzerVoice xəbər verir ki, bu barədə İspaniya KİV-i hökümət mənbələrinə istinadla məlumat yayıb.

Məlumata görə, müqavilənin dəyəri 287,5 milyon avro təşkil edirdi və avadanlıqlar İsrail şirkətinin lisenziyası ilə İspaniyada istehsal olunmalı idi.

İspaniya Müdafiə Nazirliyindəki mənbələr bildiriblər ki, İsrail lisenziyalarının ləğvi prosesi başlayıb və nazirliyin texnoloji müstəqillik məqsədinə nail olmaq üçün proqramların istiqamətini dəyişməyə çalışdığını qeyd ediblər.

Məlumat üçün bildirək ki, İspaniya Baş naziri sosialist Pedro Sançes Avropada İsrail Baş naziri Binyamin Netanyahuya və Qəzzaya hücumlara ən sərt şəkildə qarşı çıxanlardan biridir. O, xüsusilə 2023-cü ildə HƏMAS-ın İsrailin cənubuna hücumundan sonra bu mövzuda sərt mövqedə dayanır.