Foto: Vikipediya
BAKI, AzerVoice
Danimarka ABŞ-nin Qrenlandiyanı nəzarət altına almaq üçün göstərdiyi təzyiqlərə boyun əyməyəcək.
AzerVoice xəbər verir ki, bu barədə Danimarkanın baş naziri Mette Frederiksen bildirib.
Frederiksen, yarı-müstəqil statusa malik Qrenlandiya sakinlərinin öz müqəddəratını təyinetmə hüququnun təhlükə altında olduğunu da vurğulayıb.
"Nəsillər boyu qurduğumuz beynəlxalq qaydalar sistemi misli görünməmiş çağırışlarla üz-üzədir" - deyə, M.Frederiksen qeyd edib.
"Son aylarda Qrenlandiya və Danimarka ən yaxın müttəfiqlərimiz (ABŞ nəzərdə tutulur - red.) tərəfindən qəbuledilməz təzyiqlərə məruz qalıb. Amma biz təslim olmuruq. Biz danimarkalılar bu cür insanlar deyilik", - o əlavə edib.
Qeyd edək ki, ABŞ prezidenti Donald Tramp dəfələrlə ABŞ-nin milli və beynəlxalq təhlükəsizlik baxımından strateji əhəmiyyətə və zəngin mineral ehtiyatlarına sahib olan Arktika adası Qrenlandiyanı nəzarət altına almaq istədiyini bildirmişdi. O, bunu etmək üçün güc tətbiqini istisna etməmişdi.
Mart ayında Qrenlandiyaya etdiyi səfərdə ABŞ-ın vitse-prezidenti Cey Di Vens Danimarkanı Qrenlandiyanın təhlükəsizliyini qorumaqda uğursuzluqda ittiham etmiş və ABŞ-ın bu işi daha yaxşı görəcəyini demişdi.
