BAKI, AzerVoice
120 ölkədən yüksək səviyyəli nümayəndələr bu gün Fransada Birləşmiş Millətlər Təşkilatının (BMT) üçüncü Okean Konfransı (UNOC3) üçün bir araya gələcək. Bir çox vətəndaş cəmiyyəti təşkilatını bir araya gətirəcək konfransda iqlim dəyişikliyi və insan fəaliyyətləri təhlükəsi altında olan okeanların qorunması istiqamətində atılan addımlar da müzakirə olunacaq.
AzerVoice xəbər verir ki, 9–13 iyun tarixlərində Aralıq dənizinə sahili olan Fransanın Nitsa şəhərində keçiriləcək konfransa Avropa İttifaqı (Aİ) Komissiyasının Prezidenti Ursula fon der Leyen, Aİ Şurasının Prezidenti Antonio Kosta, Aİ-nin Xarici Siyasət və Təhlükəsizlik üzrə Ali Nümayəndəsi Kaja Kallas, BMT Baş katibi Antonio Quterreşlə yanaşı, 120-dən çox ölkənin dövlət başçısı, baş naziri və ya yüksək səviyyəli nümayəndəsi qatılacaq.
Konfrans Kosta Rika və Fransanın həmsədrliyi ilə təşkil olunacaq.
Yelisey sarayından verilən açıqlamada bildirilib ki, konfrans iqlim dəyişikliyi, dəniz səviyyəsinin qalxması, həddindən artıq balıq ovlanması, qeyri-qanuni balıqçılıq kimi bir sıra təhlükələrlə üzləşən beynəlxalq okean idarəçiliyi üçün "əhəmiyyətli bir dönüş nöqtəsi" olacaq.
Açıqlamada qeyd olunub ki, konfransın məqsədi vətəndaş cəmiyyəti təşkilatlarını, elmi dairələri, özəl sektoru və yerli icmaları bir araya gətirərək "okeanların mühafizəsini davamlı hala gətirmək üçün hərəkətə keçməkdir".
Qeyd edək ki, İlk BMT-nin Okean Konfransı 2017-ci ildə İsveç və Ficinin həmsədrliyi ilə Nyu-Yorkda, ikincisi isə 2022-ci ildə Portuqaliya və Keniyanın rəhbərliyi ilə Lissabonda keçirilib.
