BAKI, AzerVoice
Almaniya Xarici İşlər Nazirliyinin rəhbəri Yoxann Vadeful bəyan edib ki, ölkəsi İran ətrafında baş verən hadisələrlə bağlı ABŞ və İsrailin malik olduğu bütün kəşfiyyat məlumatlarına sahib deyil və bu səbəbdən onların İrana qarşı zərbələr endirməsini zəruri hesab etmələrinə hörmətlə yanaşmalıdır.
AzerVoice xəbər verir ki, bu barədə o, "Die Zeit" qəzetinə verdiyi müsahibədə bildirib.
"Biz, almanlar, ABŞ və İsrailin sahib olduğu tam kəşfiyyat məlumatlarına malik deyilik. Onlar bizə bunun (İrana endirilən zərbələrin - red.) zəruri olduğunu dedilər və biz bunu olduğu kimi qəbul etməliyik” – deyə o, vurğulayıb.
Vadeful qeyd edib ki, keçmişdə İsrail İrandan hücumlara məruz qalıb və bu səbəbdən tədbir görmək üçün ciddi əsaslara sahibdir.
“Əgər şübhə yaranarsa, bizim yerimiz İsrailin yanındadır” –
deyə, Almaniya XİN rəhbəri vurğulayıb.
Bununla yanaşı, o əlavə edib ki, Almaniyanın İranın nüvə
proqramının tamamilə məhv edildiyinə ciddi şübhə ilə yanaşmaq
hüququ var.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.
