BAKI, AzerVoice
Böyük Britaniyada fəaliyyət göstərən "LVMH Moet Hennessy Louis Vuitton SA" şirkətinin bölməsi kiberhücuma məruz qalıb.
AzerVoice-un məlumatına görə, kiberhücum nəticəsində bəzi müştəri məlumatları oğurlanıb.
Şirkət müştərilərinə bildirib ki, "Louis Vuitton UK" sistemlərinə icazəsiz giriş 2 iyul tarixində baş verib. Hakerlər istifadəçilərin adlarına, əlaqə məlumatlarına və alış-veriş tarixçəsinə çıxış əldə ediblər. Bununla belə, hakerlər maliyyə məlumatları, o cümlədən bank hesablarına dair məlumatlara nəzarət əldə edə bilməyib.
“Hazırda sizin məlumatlarınızın sizə zərər vermək üçün istifadə olunduğuna dair sübut olmasa da, mümkün fişinq cəhdləri, fırıldaqçılıq və ya məlumatlarınızdan icazəsiz istifadə barədə xəbərdar edirik” – deyə, "LVMH"nin müştərilərə müraciətində qeyd olunub.
Şirkət bu kiberhücumla bağlı müvafiq dövlət qurumlarını da məlumatlandırıb.
Qeyd edək ki, bu, "LVMH" qrupuna qarşı son aylarda həyata keçirilən üçüncü kiberhücumudur. Belə ki, keçən həftə "Louis Vuitton Korea" bölməsi də müştəri məlumatlarının oğurlandığı oxşar hadisəni araşdırdığını açıqlayıb.
May ayında isə "LVMH"yə məxsus "Christian Dior Couture" brendi də kiberhücumla üzləşdiyini bildirmişdi.
Xatırladaq ki, bu ilin əvvəlində Böyük Britaniyanın moda pərakəndə satış şəbəkəsi "Marks & Spencer" də miqyaslı bir kiberhücumun qurbanı olmuşdu. Şirkət həmin hücumun nəticələrini 300 milyon funt sterlinq dəyərində qiymətləndirib.
"LVMH"nin səhmləri cümə günü keçirilən ticarət sessiyasında 2,7 faiz dəyər itirib.
