BAKI, AzerVoice
Bu gün Avropa İttifaqının (Aİ) xarici işlər nazirlərinin iclasında Gürcüstanla vizasız rejimin ləğv olunması məsələsinin müzakirəyə çıxarılacağı gözlənilir.
AzerVoice xəbər verir ki, bu barədə “Politico” nəşri diplomatik mənbələrə istinadən məlumat yayıb.
Məlumata görə, Aİ Gürcüstan hakimiyyətinin, xüsusilə “Gürcü Arzusu – Demokratik Gürcüstan” partiyasının dinc etiraz aksiyalarını dağıltması fonunda vizasız rejimin dayandırılmasını Tbilisiyə təzyiq vasitəsi kimi nəzərdən keçirir. Lakin Aİ uzun müddət bu addımı atmaqdan çəkinib, çünki təşkilat daxilində bir neçə ölkə bu cür tədbirlərə qarşı çıxıb.
Qeyd edək ki, Gürcüstanda genişmiqyaslı etirazlar ötən il noyabrın 28-də başlayıb. İlk həftə gərgin keçib, Tbilisidə bəzi nümayişçilər polisə qarşı pirotexniki vasitələrdən istifadə edib, cavab olaraq təhlükəsizlik qüvvələri onlara qarşı gözyaşardıcı qaz tətbiq edib. Gecə boyunca davam edən toqquşmalardan sonra xüsusi təyinatlılar etirazçıları Rustaveli prospektindən uzaqlaşdırıblar.
Etirazlara səbəb Baş nazir İrakli Kobaxidzenin “Gürcü Arzusu” partiyasının Aİ-yə üzvlük danışıqlarını 2028-ci ilə qədər gündəmə salmayacağı və Aİ-nin büdcə qrantlarından imtina edəcəyi barədə bəyanatı olub. O, bu qərarı Aİ-nin Gürcüstan parlamentində qəbul edilmiş bir sıra qanunların ləğvini tələb etməsi, üzvlük dialoqu ilə bağlı davamlı şantaj və hökumətə qarşı sanksiyalar çağırışları ilə əsaslandırıb.
