BAKI, AzerVoice
İspaniyanın xarici işlər naziri Xose Manuel Albarez Avropa İttifaqını (Aİ), Qəzza zolağında münaqişə davam etdiyi müddət ərzində İsraillə assosiasiya sazişinin icrasını dayandırmağa çağırıb.
AzerVoice xəbər verir ki, o bu fikirləri Aİ ölkələrinin xarici işlər nazirlərinin görüşü ərəfəsində səsləndirib.
“Hesab edirəm ki, atıla biləcək üç konkret addım var. Birincisi, assosiasiya sazişinin, heç olmasa müharibə bitənə qədər, dayandırılmasıdır” – deyə, Albarez bildirib.
O əlavə edib ki, ikinci addım kimi İsrailə silah satışına embarqo qoyulması, üçüncü addım isə iki dövlətli həll prinsipinə mane olan şəxslərə qarşı sanksiya siyahısının genişləndirilməsi ola bilər.
Qeyd edək ki, daha əvvəl “Politico” nəşri Avropa İttifaqının Qəzzadakı vəziyyətlə əlaqədar İsraillə assosiasiya sazişini dayandırmaq imkanını müzakirə etdiyini yazmışdı. Bu gün isə İsrail hökuməti Qəzza zolağında humanitar vəziyyətin yaxşılaşdırılması ilə bağlı hesabatını təqdim etməlidir.
