BAKI, AzerVoice , Fərid Mikayılov

Almaniya Silahlı Qüvvələri Qəzza zolağına humanitar yardım məqsədilə hava nəqliyyatı ilə çatdırılma əməliyyatına start verib.

AzerVoice xəbər verir ki, Almaniya Müdafiə Nazirliyinin yaydığı açıqlamada bildirilib ki, Bundesverə (Almaniya Silahlı Qüvvələri) məxsus iki təyyarə Qəzzaya ümumilikdə 14 ton yardım yükü göndərib.

Yardımın məqsədi bölgədə humanitar vəziyyətin yüngülləşdirilməsinə töhfə verməkdir. Müdafiə naziri Boris Pistorius prosesin simvolik və məhdud xarakter daşıdığını etiraf etsə də, onun vacibliyini vurğulayıb.

“Bu yardım uçuşları, Qəzza əhalisinin təməl ehtiyaclarını ödəmək üçün yalnız çox kiçik bir addımdır. İsraildən gözləntimiz budur ki, bölgəyə genişmiqyaslı və davamlı humanitar yardımın təmin olunmasına şərait yaradılsın” – deyə Pistorius bildirib.

Almaniya hökuməti eyni zamanda Birləşmiş Millətlər Təşkilatının Ümumdünya Ərzaq Proqramına (WFP) Qəzzaya dəstək üçün əlavə 5 milyon avro (təxminən 5,7 milyon ABŞ dolları) ayırdığını açıqlayıb.